കൊച്ചി: ലോക്ക് ഡൗണിന്റെ പശ്ചാത്തലത്തിലും മരുന്നുവില്‍പനയില്‍ ജന്‍ ഔഷധി കേന്ദ്രങ്ങള്‍ക്ക് മികച്ച നേട്ടം. ഇക്കഴിഞ്ഞ മാര്‍ച്ചില്‍ 42 കോടി രൂപയുടെ മരുന്നാണ് ജന്‍ ഔഷധി കേന്ദ്രങ്ങളിലൂടെ വിറ്റിരുന്നത്. എന്നാല്‍, ഇത് ഏപ്രിലില്‍ 52 കോടി രൂപയായി വര്‍ധിച്ചു. 2019 ഏപ്രിലില്‍ ഇത് 17 കോടിയായിരുന്നു.
900ലധികം ഗുണനിലവാരമുള്ള ജനറിക് മരുന്നുകളും 154ഓളം ശസ്ത്രക്രിയാ ഉപകരണങ്ങളും മിതമായ നിരക്കില്‍ ഇവിടെ ലഭ്യമാണ്.
സമീപത്തെ ജന്‍ ഔഷധി കേന്ദ്രങ്ങള്‍ കണ്ടെത്തുന്നതിനും മരുന്നുകളുടെ വില അറിയുന്നതിനും 'ജന്‍ ഔഷധി സുഗം' എന്ന മൊബൈല്‍ ആപ്പ് തയാറാക്കിയിട്ടുണ്ട്. 3,25,000ലധികം ആളുകള്‍ ഈ ആപ്ലിക്കേഷന്‍ ഉപയോഗിക്കുന്നുണ്ട്.
ഗൂഗിള്‍ മാപ്പിന്റെ സഹായത്തോടെ ജന്‍ ഔഷധി കേന്ദ്രങ്ങള്‍ കണ്ടെത്തുന്നതിന് ഇതിലൂടെ കഴിയും. ഒപ്പം ലഭ്യമായിട്ടുള്ള മരുന്നുകളുടെ വിലയും ബ്രാന്‍ഡഡ് മരുന്നുകളുമായുള്ള താരതമ്യവും സാധിക്കും. നിലവില്‍ രാജ്യത്ത് 726 ജില്ലകളിലായി 6,300 ജന്‍ ഔഷധി കേന്ദ്രങ്ങളാണ് പ്രവര്‍ത്തിക്കുന്നത്.