മാഹി: അധ്യാപകര്‍ക്ക് വിദ്യാര്‍ഥികളോടും സമൂഹത്തോടും ഒരുപാട് ഉത്തരവാദിത്വങ്ങളുണ്ടെന്നും അത് നിറവേറ്റുന്നവര്‍ മാത്രമേ നല്ല അധ്യാപകരാവുകയുള്ളൂവെന്നും ടി. പത്മനാഭന്‍. പൊതുവിദ്യാഭ്യാസ വകുപ്പ് നടത്തുന്ന വിദ്യാരംഗം കലാ സാഹിത്യ വേദിയുടെ ത്രിദിന സംസ്ഥാന അധ്യാപക സാഹിത്യ ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം. കൊച്ചിയിലെ പ്രശസ്തമായ ഒരു കലാലയത്തിലെ കവയിത്രിയായ അധ്യാപിക കവിത മോഷ്ടിച്ച സംഭവവും മറ്റും നമ്മുടെ അധ്യാപക സമൂഹം വിലയിരുത്തണം. നല്ല അധ്യാപകര്‍ നല്ല വിദ്യാര്‍ഥികളുമായിരുന്നിരിക്കാം. നല്ല വിദ്യാര്‍ഥികളായിരുന്നവര്‍ക്ക് മാത്രമേ നല്ല അധ്യാപകരാകാന്‍ കഴിഞ്ഞിട്ടുള്ളൂ. ഒരു അധ്യാപകന് ലഭിക്കുന്ന ഏറ്റവും വലിയ സൗഭാഗ്യം നല്ല വിദ്യാര്‍ഥികളെ ലഭിക്കുകയെന്നതാണ്. തിരിച്ചും അങ്ങിനെ തന്നെയാണ് വിദ്യാര്‍ഥികളുടെ സൗഭാഗ്യമെന്നത് നല്ല അധ്യാപകരെ ലഭിക്കലാണെന്നും അദ്ദേഹം വ്യക്തമാക്കി. ജെസി ജോസഫ് അധ്യക്ഷനായി. ടി.പി നിര്‍മ്മലാദേവി, എ. ഷിജു, കെ.സി അലി ഇഖ്ബാല്‍, ഇ.പി രാജഗോപാല്‍, വി.ആര്‍ സുധീഷ്, പ്രൊഫ. സി.പി ചിത്രഭാനു സംസാരിച്ചു.