വോള്‍ഗോഗ്രാഡ്: കാത്തുവച്ചൊരു കസ്തൂരി മാമ്പഴം കാക്ക കൊത്തി പോയി എന്നൊരു ചൊല്ലുണ്ട്. അത് യാഥാര്‍ഥ്യമായി എന്നു തന്നെ പറയാം. വോള്‍ഗോഗ്രാഡ് അരീനയില്‍ നടന്ന ഇംഗ്ലണ്ട് - തുനീഷ്യ മത്സരത്തിന്റെ 91ാം മിനുട്ട് തുനീഷ്യക്കാര്‍ക്ക് ഒരിക്കലും മറക്കാന്‍ സാധിക്കില്ല. ഒരു നിമിഷത്തെ അശ്രദ്ധ കൊണ്ട് അവര്‍ അര്‍ഹിച്ച സമനിലയാണ് നഷ്ടപ്പെടുത്തിയത്. 

അവസാന മിനുട്ടില്‍ ഹാരി കെയ്ന്‍ നേടിയ സുന്ദര ഗോളില്‍ തുനീഷ്യ ഒരുക്കിയ സമനിലക്കുരുക്ക് അഴിച്ചെടുത്ത് ഇംഗ്ലണ്ട് റഷ്യന്‍ ലോകകപ്പിലെ ആദ്യ ജയം സ്വന്തമാക്കി. വമ്പന്മാരെല്ലാം മുട്ടുമടക്കിയ റഷ്യന്‍ ലോകകപ്പില്‍ ഇംഗ്ലണ്ടും അതുവഴിയേ തന്നെ നീങ്ങിയ നിമിഷം. പക്ഷേ ക്യാപ്റ്റന്‍ ഹാരി കെയ്‌നിന് ഇംഗ്ലണ്ടിനെ തോല്‍വിയിലേക്ക് പറഞ്ഞയക്കാന്‍ മനസില്ലായിരുന്നു. ഇരട്ടഗോള്‍ നേടി തന്റെ ടീമിനെ അദ്ദേഹം മുന്നില്‍ നിന്ന് നയിച്ചു. മത്സരത്തിന്റെ അവസാനം വരെ കൃത്യമായി ഹാരി കെയ്‌നിനെ മാര്‍ക്ക് ചെയ്ത തുനീഷ്യന്‍ പ്രതിരോധം ഒരു നിമിഷത്തെ അമളിക്ക് വലിയ വില നല്‍കേണ്ടി വന്നു.
മിന്നല്‍ ആക്രമണത്തോടെ തുടക്കം മുതല്‍ തുനീഷ്യന്‍ ഗോള്‍മുഖത്തേക്ക് ഓട്ടിക്കയറിയെങ്കിലും ഇംഗ്ലണ്ടിന് ആഫ്രിക്കന്‍ കരുത്തരുടെ പ്രതിരോധ കോട്ട തകര്‍ക്കാനായില്ല. മൂന്നാം മിനുട്ടിലാണ് ഇംഗ്ലണ്ട് ആദ്യ മുന്നേറ്റം നടത്തുന്നത്. ലിന്‍ഗാര്‍ഡിന്റെ ഗോളെന്നുറച്ച ഷോട്ട് തുനീഷ്യന്‍ ഗോള്‍കീപ്പര്‍ ഹസ്സന്‍ തട്ടിയകറ്റി. കളിയുടെ ഗതിക്ക് അനുകൂലമായി 11ാം മിനുട്ടില്‍ ആദ്യ ഗോള്‍ വീണു. ആഷ്‌ലി യങിന്റെ കോര്‍ണറില്‍ ഹാരി കെയ്‌നായിരുന്നു ആദ്യ ഗോള്‍ നേടിയത്. ഗോള്‍ വീണതോടെ തുനീഷ്യ സടകുടഞ്ഞെഴുന്നേറ്റു. വേഗതായാര്‍ന്ന നീക്കത്തോടെ അവര്‍ ഇംഗ്ലണ്ടിനെ ആക്രമിച്ചു. 35ാം മിനുട്ടില്‍ ഇതിന് ഫലം കണ്ടു. തുനീഷ്യന്‍ താരത്തെ ബോക്‌സില്‍ വീഴ്ത്തിയതിന് ലഭിച്ച പെനാല്‍റ്റി ഫെര്‍ജാനി സാസ്സി ലക്ഷ്യത്തിലെത്തിച്ചു(1-1). ഇതോടെ പ്രതിസന്ധിയിലായ ഇംഗ്ലണ്ട് വിജയം കൈവിടുമെന്ന് തോന്നിയ നിമിഷമാണ് ക്യാപ്റ്റന്‍ ഹാരി കെയന്‍ അവരുടെ രക്ഷകനായെത്തുന്നത്. അവസാന മിനുട്ടുകളില്‍ നടത്തിയ നിരന്തര നീക്കങ്ങള്‍ക്കൊടുവില്‍ ലഭിച്ച കോര്‍ണറില്‍ നിന്നാണ് ഹാരികെയ്ന്‍ തന്റെയും ഇംഗ്ലണ്ടിന്റെയും രണ്ടാം ഗോള്‍ നേടിയത്. 12ാം നമ്പര്‍ താരം ട്രിപ്പറായിരുന്നു ഇംഗ്ലണ്ടിന്റെ പല നീക്കള്‍ക്കും ചുക്കാന്‍പിടിച്ചത്. ഇതോടെ ഗ്രൂപ്പ് ജിയില്‍ മൂന്ന് പോയിന്റ് നേടിയ ഇംഗ്ലണ്ട് ബെല്‍ജിയത്തിന് പിറകില്‍ രണ്ടാം സ്ഥാനത്താണ്. ഗോള്‍ ശരാശരിയിലാണ് ബെല്‍ജിയം മുന്നിലെത്തിയത്. മത്സരത്തിനിടെ ഗോള്‍കീപ്പര്‍ ഹസന്‍ പരുക്കുമൂലം കളം വിട്ടത് തുനീഷ്യക്ക് തിരിച്ചടിയായി.