നീലേശ്വരം: നാടിനു മാതൃകയായി ക്ഷേത്രവും മുസ്‌ലിം പള്ളിയും. കമ്മാടം പള്ളിയും നെരോത്ത് അമ്പലവുമാണു മതസൗഹാര്‍ദ്ദത്തിന്റെ വിളനിലമായി നിലകൊള്ളുന്നത്. പൂരംകുളിയുടെ ഭാഗമായി ഇന്നലെ നെരോത്ത് അമ്പലത്തിലെത്തിയ പള്ളി ഭാരവാഹികളെ ആദരവോടു കൂടി ക്ഷേത്രം ഭാരവാഹികള്‍ വരവേറ്റു.  തുടര്‍ന്നു ചടങ്ങുകളുടെ ഭാഗമായി ക്ഷേത്രത്തില്‍ നിന്നു പള്ളി ഭാരവാഹികള്‍ക്ക് കോഴിയും അഞ്ഞൂറു രൂപയും നല്‍കി.
പള്ളി ഭാരവാഹികളായ സുല്‍ഫിക്കര്‍ കമ്മാടം, നസീര്‍ കമ്മാടം, അമീര്‍ കമ്മാടം, യു.വി അബ്ദുല്‍റഹ്മാന്‍, ഷൗക്കത്തലി കമ്മാടം, കുഞ്ഞബ്ദുല്ല കുളത്തിങ്കാല്‍, കെ.കെ ഷാനവാസ്, സുബൈര്‍ കമ്മാടം എന്നിവരാണ് സംഘത്തിലുണ്ടായിരുന്നത്.
ഈ മാസം 20നു തുടങ്ങുന്ന കമ്മാടം മഖാം ഉറൂസിലേക്കു ക്ഷേത്രം ഭാരവാഹികളെ പതിവുപോലെ ക്ഷണിക്കുകയും ചെയ്തു.
 21 നു ഉച്ചയ്ക്കു ക്ഷേത്രം ഭാരവാഹികള്‍ എത്തി മഖാം തുറന്നുകൊടുക്കുന്നതോടെ മാത്രമേ ഉറൂസിനു തുടക്കമാകൂ. തുടര്‍ന്നു പള്ളിയില്‍ നിന്നു സദ്യയും കഴിച്ചായിരിക്കും ക്ഷേത്രം ഭാരവാഹികള്‍ മടങ്ങുക.
വര്‍ഷങ്ങളായി ഈ മതസൗഹാര്‍ദ്ദം തുടര്‍ന്നു പോരുകയാണ്.