തിരുവനന്തപുരം: ന്യൂസ് ഫോട്ടോഗ്രഫിയില്‍ ദേശീയ തലത്തില്‍ മത്സരവും മാധ്യമ ചരിത്ര പ്രദര്‍ശനവും ഉള്‍പ്പെടെ സംഘടിപ്പിച്ച് തിരുവനന്തപുരം പ്രസ്‌ക്ലബ് ജേണലിസം ഇന്‍സ്റ്റിറ്റ്യൂട്ട് സുവര്‍ണ ജൂബിലി ആഘോഷങ്ങള്‍ സംഘടിപ്പിക്കുന്നു. തിരുവനന്തപുരം നഗരസഭയുടെ സഹകരണത്തോടെ ഏപ്രില്‍ അഞ്ചുമുതല്‍ 15 വരെ കനകക്കുന്നിലെ സൂര്യകാന്തി ഗ്രൗണ്ടില്‍ ആഘോഷപരിപാടികള്‍ നടക്കുമെന്ന് സംഘാടക സമിതി രക്ഷാധികാരി മേയര്‍ വി.കെ പ്രശാന്ത് വാര്‍ത്താസമ്മേളനത്തില്‍ പറഞ്ഞു.
ഒരു ലക്ഷം രൂപ സമ്മാനം നല്‍കുന്നതാണ് ന്യൂസ് ഫോട്ടോഗ്രഫി മത്സരം. എസ്.എസ് റാം- എസ്. ഹരിശങ്കര്‍ മെമ്മോറിയല്‍ അവാര്‍ഡിനായുള്ള മത്സരത്തിലേക്ക് ഒരാള്‍ക്ക് മൂന്ന് എന്‍ട്രികള്‍ വീതം അയക്കാം.

2018 ജനുവരി ഒന്നിനും ഡിസംബര്‍ 31നും ഇടയില്‍ പ്രസിദ്ധീകരിച്ച ചിത്രം മാത്രമെ മത്സരത്തിനു പരിഗണിക്കൂ.
അപേക്ഷാ ഫോറം സലൃമഹമുൃലരൈഹൗയ.രീാ എന്ന വെബ്‌സൈറ്റില്‍ നിന്ന് ഡൗണ്‍ലോഡ് ചെയത് ുൃലുൈവീീേരീിലേേെ@ഴാമശഹ.രീാ എന്ന ഇ മെയിലിലേക്ക് അയക്കാം.
'കനകോത്സവം' എന്ന പേരില്‍ പ്രസ്‌ക്ലബ് സംഘടിപ്പിക്കുന്ന പരിപാടിയില്‍ കല്ലച്ച് മുതല്‍ ആധുനിക അച്ചടി സംവിധാനങ്ങള്‍ വരെ പരിചയപ്പെടുത്തുന്ന മാധ്യമ ചരിത്ര പ്രദര്‍ശനം, മാധ്യമ പ്രവര്‍ത്തകരെ ആദരിക്കല്‍, കലാവിരുന്നുകള്‍ എന്നിവ ഉള്‍പ്പെടെ വിവിധ പരിപാടികള്‍ സംഘടിപ്പിക്കും. വാര്‍ത്താസമ്മേളനത്തില്‍ പ്രസ്‌ക്ലബ് സെക്രട്ടറി എം. രാധാകൃഷ്ണന്‍, പ്രസിഡന്റ് ജി. പ്രമോദ്, ഇന്‍സ്റ്റിറ്റ്യൂട്ട് ഓഫ് ജേണലിസം ഡയരക്ടര്‍ ഋഷി കെ. മനോജ്, സിസ്സ ജനറല്‍ സെക്രട്ടറി സി. സുരേഷ് കുമാര്‍ പങ്കെടുത്തു.