പൊന്നാനി: ടൗണിലെ ബലക്ഷയമുള്ള കെട്ടിടങ്ങളെക്കുറിച്ച് ഫയര്‍ഫോഴ്‌സ് നല്‍കിയ മുന്നറിയിപ്പിന് പുല്ലുവില. ഏത് നിമിഷവും നിലംപൊത്തുമെന്ന നിലയിലുള്ള കാലപ്പഴക്കമേറിയ ഒട്ടനവധി കെട്ടിടങ്ങളാണ് നഗരത്തിലുള്ളത്.
ഏപ്രില്‍ 20ന് അങ്ങാടി പാലത്തിനോട് ചേര്‍ന്ന കടകള്‍ കത്തിനശിച്ചതിനെത്തുടര്‍ന്നാണ് ഫയര്‍ഫോഴ്‌സ് പൊന്നാനി തഹസില്‍ദാര്‍ക്കും നഗരസഭ സെക്രട്ടറിക്കും റിപ്പോര്‍ട്ട് സമര്‍പ്പിച്ചത്. കെട്ടിടങ്ങളുടെ കാലപ്പഴക്കവും അശാസ്ത്രീയതയും സംബന്ധിച്ച വിശദമായ റിപ്പോര്‍ട്ടാണ് ഫയര്‍ഫോഴ്‌സ് നല്‍കിയത്. പഴയ നിര്‍മാണരീതിയായതിനാല്‍ അപകടങ്ങള്‍ സംഭവിക്കുമ്പോള്‍ രക്ഷാപ്രവര്‍ത്തനം നടത്തുന്നതിനുള്ള പ്രയാസങ്ങളും റിപ്പോര്‍ട്ടില്‍ ചൂണ്ടിക്കാണിച്ചിരുന്നു. ചെറിയൊരു തീ നാളമുണ്ടായാല്‍ പോലും തീ പടരുന്ന തരത്തിലാണ് കെട്ടിടങ്ങളുടെ നിര്‍മാണം. ആവശ്യത്തിന് വാതിലുകളില്ലാത്തതിനാല്‍ കെട്ടിടത്തിനകത്ത് അപകടം സംഭവിച്ചാല്‍ രക്ഷാപ്രവര്‍ത്തനം ദുഷ്‌ക്കരമാണ്.
കെട്ടിടങ്ങളുടെ അവസ്ഥ സംബന്ധിച്ചുള്ള മുന്നറിയിപ്പ് എന്ന നിലയിലാണ് റിപ്പോര്‍ട്ട് നല്‍കിയത്. ഗുരുതരമായ മുന്നറിയിപ്പുകള്‍ ഉള്‍ക്കൊള്ളുന്നതാണ് റിപ്പോര്‍ട്ട്. ചില കെട്ടിടമുടമകള്‍ സ്വന്തം ഇഷ്ടപ്രകാരം കെട്ടിടങ്ങള്‍ പൊളിച്ചുനീക്കുന്നതൊഴിച്ച് അധികൃതര്‍ അനങ്ങാപ്പാറനയം കൈക്കൊള്ളുന്നതായാണ് ആക്ഷേപം.
ഫിറ്റ്‌നസില്ലാത്ത കെട്ടിടങ്ങളില്‍ പ്രവര്‍ത്തിക്കുന്ന കടകള്‍ക്ക് ലൈസന്‍സ് പുതുക്കിനല്‍കില്ലെന്ന് നഗരസഭാധികൃതര്‍ ആദ്യം അറിയിച്ചിരുന്നെങ്കിലും പിന്നീട് ചില കടകള്‍ക്ക് ലൈസന്‍സ് പുതുക്കി നല്‍കുകയും ചെയ്തു.
ചില വ്യാപാര സംഘടനകളുടെ സമ്മര്‍ദ്ദം മൂലമാണ് ലൈസന്‍സ് പുതുക്കി നല്‍കിയതെന്നാണ് ആരോപണം.