ജാംനഗര്‍: ഇന്ത്യന്‍ ക്രിക്കറ്റ് താരം രവീന്ദ്രജഡേജയുടെ ഭാര്യ രിവാബ ബി.ജെ.പിയില്‍ ചേര്‍ന്നു. ഗുജറാത്ത് മന്ത്രി ആര്‍.സി ഫലാദു, പൂനംബെന്‍ എ.പി, ബക്കുഭായി എം.എല്‍.എ എന്നിവരുടെ സാന്നിധ്യത്തില്‍ ഇന്നലെ ജാംനഗറില്‍ നടന്ന ചടങ്ങില്‍ വച്ച് താരത്തിന്റെ ഭാര്യ പാര്‍ട്ടിയുടെ അംഗത്വം സ്വീകരിച്ചു. നേരത്തെ താരവും ഭാര്യയും പ്രധാനമന്ത്രി നരേന്ദ്രമോദിയെ അദ്ദേഹത്തിന്റെ ഔദ്യോഗിക വസതിയിലെത്തി കണ്ടിരുന്നു. ഇതോടെ രവീന്ദ്ര ജഡോജ ബി.ജെ.പിയോട് അടുക്കുന്നുവെന്ന റിപ്പോര്‍ട്ടുകള്‍ ഉയരുന്നതിനിടെയാണ് അദ്ദേഹത്തിന്റെ ഭാര്യ പാര്‍ട്ടി അംഗത്വമെടുത്തത്.

പത്മാവതി ചിത്രത്തിനെതിരെ ഉത്തരേന്ത്യയിലുടനീളം അക്രമാസക്ത പ്രതിഷേധപരിപാടികള്‍ നടത്തിയ ക്ഷത്രിയ- രജ്പുത് സംഘടനയായ കര്‍ണിസേനയുടെ വനിതാ വിഭാഗത്തിന്റെ ഗുജറാത്ത് ഘടകം അധ്യക്ഷസ്ഥാനം അടുത്തിടെ രിവാബ ജഡേജ ഏറ്റെടുത്തിരുന്നു.