റിയാദ്: ലോക വന്‍ശക്തികളുടെ പട്ടികയിലേക്ക് കുതിച്ചു കയറി സഊദി അറേബ്യാ. സാമ്പത്തിക ശേഷി, രാഷ്ട്രീയ സ്വാധീനം, സൈനിക മേഖലയില്‍ ഉണ്ടാക്കിയ വിപ്ലവം സഊദിയെ ആദ്യ പത്ത് രാജ്യങ്ങളിലാണ് എത്തിച്ചിരിക്കുന്നത്. അമേരിക്ക ആസ്ഥാനമായ യു.എസ് ന്യൂസ് ആന്റ് വേള്‍ഡ് മാഗസിന്‍ പെന്‍സില്‍വാനിയ സര്‍വ്വകലാശാലയുമായി ചേര്‍ന്ന് നടത്തിയ പഠനത്തിലാണ് ഒന്‍പതാമത്തെ സ്ഥാനം സഊദി കരസ്ഥമാക്കിയത്.

അമേരിക്കയാണ് വന്‍ശക്തികളില്‍ ഒന്നാം സ്ഥാനത്ത്. തൊട്ടു പിന്നില്‍ റഷ്യയും, ചൈന, ജര്‍മ്മനി, ബ്രിട്ടണ്‍ എന്നീ രാജ്യങ്ങളാണ് തുടര്‍ന്നുള്ള മൂന്നു സ്ഥാനങ്ങളും യഥാക്രമം നേടിയത്. മാഗസിനില്‍ പ്രസിദ്ധീകരിച്ച റിപ്പോര്‍ട്ടില്‍ മധ്യ പൗരസ്ത്യ ദേശത്തെ ഭീമനാണ് സഊദിയെന്നും വിശേഷിപ്പിക്കുന്നുണ്ട്. ആദ്യ പത്ത് വന്‍ശക്തി രാഷ്ട്രങ്ങളെയാണ് പട്ടികയില്‍ തിരഞ്ഞെടുത്തിരിക്കുന്നത്.

രാഷ്ട്രീയ, സാമ്പത്തിക, സൈനിക കൂട്ടുകെട്ട് ഉണ്ടാക്കുന്നതില്‍ സഊദിക്ക് അതിവേഗ കഴിവാണുള്ളതെന്നും വിവിധ പ്രതിസന്ധികളും പ്രശ്‌നങ്ങളും നേരിടുന്നതില്‍ സഊദിക്ക് അതിയായ സാമര്‍ത്യമാണുള്ളതെന്നും സഊദിയെ പരിഗണിച്ചതില്‍ ഉള്‍പ്പെടുത്തിയിട്ടുണ്ട്. ഇതോടൊപ്പം സാമ്പത്തികമായി ഏറെ മുന്നില്‍ നില്‍ക്കുന്ന രാജ്യമാണ് സഊദിയെന്നും മാഗസിന്‍ അഭിപ്രായപ്പെടുന്നു. അതേസമയം, രാജ്യത്തിന്റെ വിദേശ നാണ്യശേഖരത്തില്‍ തുടര്‍ച്ചയായ മൂന്നാം മാസവും സഊദി വളര്‍ച്ച രേഖപ്പെടുത്തി. വിദേശ നാണ്യശേഖരം ഏറ്റവും കൂടുതലുള്ള അഞ്ചാമത്തെ രാജ്യമാണ് സഊദി. സൈനികാവശ്യങ്ങള്‍ക്കായി പണം ചെലവഴിക്കുന്നതില്‍ മൂന്നാം സ്ഥാനവും സഊദിക്കാണ്.