#നിസാര്‍ കലയത്ത്

ഇന്ത്യ പതിനേഴാമത്

ജിദ്ദ: ലോക വന്‍ശക്തി രാജ്യങ്ങളുടെ പട്ടികയില്‍ സഊദിക്ക് കുതിപ്പ്. പട്ടികയില്‍ ആദ്യ പത്തില്‍ രാജ്യം ഇടംപിടിച്ചു.
യു.എസ് ന്യൂസ് ആന്‍ഡ് വേള്‍ഡ് റിപ്പോര്‍ട്ട് റാങ്കിങ് ലിസ്റ്റില്‍ ഒന്‍പതാമതായാണ് സഊദി സ്ഥാനം പിടിച്ചത്. ഈ പട്ടികയില്‍ ഇന്ത്യ പതിനേഴാമതും യു.എ.ഇ പതിനൊന്നാമതും ആണ്.

കഴിഞ്ഞ വര്‍ഷം ഇന്ത്യയുടെ റാങ്ക് 15 ആയിരുന്നു.
പെന്‍സില്‍വാനിയ യൂനിവേഴ്‌സിറ്റിയുടെ സഹകരണത്തോടെ 80 രാജ്യങ്ങളെക്കുറിച്ച് 20,000പേര്‍ തങ്ങളുടെ അഭിപ്രായം രേഖപ്പെടുത്തിയതനുസരിച്ചാണ് മികച്ച രാജ്യങ്ങളെ തിരഞ്ഞെടുത്തത്.

ഒരുരാജ്യത്തിന്റെ രാഷ്ട്രീയ, സാമ്പത്തിക സ്വാധീനങ്ങളുടെയും രാജ്യാന്തര സഖ്യങ്ങളുടെയും സൈനിക ശക്തിയുടെയും ലോകനിലവാരം വിലയിരുത്തിയാണ് റാങ്കിങ് നിര്‍ണയിച്ചത്.

വലിയ സമ്പന്ന രാജ്യവും മധ്യപൂര്‍വദേശത്തെ ഭീമനുമാണ് സഊദിയെന്നാണ് വിലയിരുത്തല്‍.
2019ല്‍ ലോകത്തിലെ ഏറ്റവും ശക്തമായ രാജ്യമായി റാങ്കിങ് റിപ്പോര്‍ട്ട് പ്രകാരം അമേരിക്ക നില്‍ക്കുമ്പോള്‍ തൊട്ടടുത്ത് യഥാക്രമം റഷ്യ, ചൈന, ജര്‍മനി, യു.കെ, ഫ്രാന്‍സ് എന്നീ രാജ്യങ്ങളാണുള്ളത്.