ഒലവക്കോട്: തെരുവുനായനിയന്ത്രണത്തിന് പദ്ധതി ആരംഭിച്ചെങ്കിലും ജില്ലയില്‍ തെരുവുനായശല്യത്തിന് കുറവില്ല. കഴിഞ്ഞ രണ്ടരമാസത്തിനിടെ 3,211 പേര്‍ക്കാണ് നായ്ക്കളുടെ കടിയേറ്റത്. കടിച്ചവയില്‍ കൂടുതലും തെരുവുനായ്ക്കളാണ്. ഇടക്കാലത്ത് ചെറിയതോതില്‍ നിയന്ത്രണവിധേയമായിരുന്ന നായശല്യം സമീപകാലത്തായി വീണ്ടും കൂടി.. പൊതുസ്ഥലങ്ങളും ഇടവഴികളും നായ്ക്കള്‍ കൈയേറുന്നു. കഴിഞ്ഞദിവസം നഗരമധ്യത്തില്‍ റോബിന്‍സണ്‍ റോഡിലെ കോളനിയില്‍ തെരുവുനായ്ക്കള്‍ വീട്ടില്‍ക്കയറി വളര്‍ത്തുനായയെ കടിച്ചുകൊണ്ടുപോയി. പാതി കുറ്റിയിട്ടിരുന്ന നായ്ക്കൂട് തട്ടിത്തുറന്നാണ് ഇവ വളര്‍ത്തുനായയെ പിടിച്ചത്. കോളനികളിലും ഹോട്ടല്‍, കല്യാണമണ്ഡപം എന്നിവയുടെ പരിസരങ്ങളുമൊക്കെ ഇവ കൂട്ടംകൂടി നടക്കുന്നതുകാണാം. കഴിഞ്ഞവര്‍ഷം ജില്ലയില്‍ പന്തീരായിരത്തിലധികമാളുകളെ നായ കടിച്ചതായാണ് ആരോഗ്യവകുപ്പിന്റെ റിപ്പോര്‍ട്ട്. മൃഗസംരക്ഷണവകുപ്പും പഞ്ചായത്തും ചേര്‍ന്ന് നടപ്പാക്കുന്ന തെരുവുനായ പ്രജനനനിയന്ത്രണപദ്ധതി 2019'20 വര്‍ഷത്തില്‍ ലക്ഷ്യംകാണുമെന്നാണ് പ്രതീക്ഷ. കഴിഞ്ഞ ആഗസറ്റില്‍ ജില്ലയില്‍ അഞ്ചിടങ്ങളില്‍ പദ്ധതി ആരംഭിച്ചു.
പാലക്കാട്, ചിറ്റൂര്‍, കൊടുവായൂര്‍, ആലത്തൂര്‍, ഒറ്റപ്പാലം എന്നിവിടങ്ങളില്‍ തുടങ്ങിയ കേന്ദ്രങ്ങള്‍വഴി ഏഴായിരത്തോളം നായ്ക്കളെ വന്ധ്യംകരിച്ചതായി മൃഗസംരക്ഷണവകുപ്പ് ജോയന്റ് ഡയറക്ടര്‍ ഡോ. വേണുഗോപാല്‍ പറഞ്ഞു. ഇവിടങ്ങളില്‍ ലക്ഷ്യം കൈവരിച്ചാല്‍ അടുത്തകേന്ദ്രത്തിലേക്ക് നീങ്ങും. ഓരോ കേന്ദ്രത്തിനും 10 കിലോമീറ്റര്‍ ചുറ്റളവിലുള്ള പഞ്ചായത്തുകളില്‍ പദ്ധതി നടപ്പാക്കിവരുന്നുണ്ട്. ഒരു കേന്ദ്രത്തില്‍ ഒരുദിവസം 10 നായ്ക്കളെയേ ശസ്ത്രക്രിയനടത്താന്‍ കഴിയൂ.
രണ്ട് ഡോക്ടര്‍മാരും നാല് പട്ടിപിടുത്തക്കാരും ഒരു അറ്റന്‍ഡറുമുള്‍പ്പെട്ട സംഘമാണ്. പദ്ധതി നിര്‍വഹിക്കുന്നത്. 2012ലെ സെന്‍സസ് പ്രകാരം ജില്ലയില്‍ 69,000 തെരുവുനായ്ക്കളുണ്ടെന്നാണ് കണക്ക്. നാലുവര്‍ഷത്തിനിടെ ഇവ എത്ര പെരുകിയെന്ന് 2017 ജൂലായില്‍ അടുത്ത സെന്‍സസ് പൂര്‍ത്തിയാകുമ്പോള്‍ വ്യക്തമാവും. കേരളത്തില്‍ 2.7 ലക്ഷത്തോളം തെരുവുനായ്ക്കള്‍ മൃഗസംരക്ഷണവകുപ്പിന്റെ കണക്കുപ്രകാരം കേരളത്തില്‍ 2,70,000 തെരുവുനായ്ക്കളുണ്ട്. തെരുവുനായപ്രശ്‌നം സുപ്രീംകോടതിയിലെത്തിയപ്പോള്‍ കോടതി നിര്‍ദേശിച്ച ഒരു പാനല്‍ കേരളത്തിലെ തെരുവുനായപ്രശ്‌നം പഠിച്ചിരുന്നു.
2015-16 വര്‍ഷത്തില്‍ കേരളത്തില്‍ ഒരുലക്ഷത്തിലധികമാളുകളെ തെരുവുനായ കടിച്ചതായി റിപ്പോര്‍ട്ടില്‍ പറയുന്നു. 2013 ഏപ്രിലിനും 2016 ഓഗസ്റ്റിനമിടെ 3,97,908 പേര്‍ക്ക് നായുടെ കടിയേറ്റു. 2012നും 2016നുമിടെ 49 പേരാണ് പേബാധിച്ച് മരിച്ചത്.