റോസ്‌റ്റോവ് അരീന: ഗ്രൂപ്പ് എ യിലെ മത്സരത്തില്‍ സഊദിക്ക് തോല്‍വി. എതിരില്ലാത്ത ഒരു ഗോളിന് ഉറുഗ്വെയാണ് സഊദിയെ തോല്‍പ്പിച്ചത്. 

കളിയുടെ തുടക്കം മുതല്‍ ഉറുഗ്വെ ആക്രമിച്ച് കളിച്ചതോടെ സഊദി തീര്‍ത്തും പ്രതിരോധത്തിലായി. പതിയെ സഊദിയും ഗ്രൗണ്ടില്‍ മികച്ച മുന്നേറ്റങ്ങള്‍ നടത്തി. പലപ്പോഴും നല്ല മുന്നേറ്റങ്ങളിലൂടെ സഊദി ഉറുഗ്വെയുടെ ഗോള്‍ മുഖത്ത് ഭീതി വിതച്ചുകൊണ്ടിരുന്നു. 23-ാം മിനുട്ടില്‍ ഉറുഗ്വെക്ക് ലഭിച്ച കോര്‍ണര്‍ കിക്കില്‍ നിന്നായിരുന്നു ഗോള്‍ പിറന്നത്. ബോക്‌സിലേക്കെത്തിയ പന്തിനെ കാലുകൊണ്ട് പോസ്റ്റിലേക്ക് തട്ടിയിട്ട് ലൂയിസ് സൂവാരസാണ് ആദ്യ ഗോള്‍ നേടിയത്. ആദ്യ മത്സരത്തില്‍ റഷ്യയോടേറ്റ വലിയ പരാജയം മറക്കുന്ന രീതിയിലായിരുന്നു സഊദിയുടെ പ്രകടനം.
ഉറുഗ്വെന്‍ താരങ്ങളുടെ നീക്കം കൃത്യമായി മനസിലാക്കി ഓരോ മുന്നേറ്റവും സഊദി തടഞ്ഞുകൊണ്ടിരുന്നു. ആദ്യ പകുതിക്ക് ശേഷം സഊദി കൂടുതല്‍ ഉണര്‍ന്നു കളിച്ചെങ്കിലും ലക്ഷ്യം കാണാനായില്ല. പരുക്കേറ്റ സഊദിയുടെ മധ്യനിര താരം ഹതന്‍ ബാഹിറിനെ പിന്‍വലിച്ച് മുഹമ്മദ് കാനൊയേ കളത്തിലിറക്കി അറ്റാക്കിങ്ങ് മിഡ്ഫീല്‍ഡറുടെ റോളില്‍ കളിപ്പിച്ചെങ്കിലും മാറ്റമൊന്നുമുണ്ടായില്ല. സഊദിയുടെ ഓരോ നീക്കങ്ങളും സുന്ദരമായിരുന്നെങ്കിലും ഗോളൊന്നും നേടാനാവാതെ രണ്ടാം മത്സരത്തിലും തോല്‍വി ഏറ്റുവാങ്ങി സഊദി മടങ്ങി.