കൊച്ചി: കേസരി എ ബാലകൃഷ്ണപിള്ള ഉയര്‍ത്തിപ്പിടിച്ച പുരോഗമനപരമായ ആശയങ്ങള്‍ കൂടുതല്‍ തിരിച്ചറിയാനും ജീവിതപരിസരങ്ങളില്‍ ശക്തിമത്തായി ഉയര്‍ത്തിപ്പിടിക്കാനും കഴിയണമെന്ന് മുഖ്യമന്ത്രി പിണറായി വിജയന്‍.
മതനിരപേക്ഷത, സാര്‍വ ദേശീയത, സാമൂഹ്യനീതി, പുരോഗതി എന്നിവയ്ക്കായി വിട്ടുവീഴ്ച്ചയില്ലാതെയാണ് കേസരി പോരാടിയത്. എന്നാല്‍ ഇന്ന് കേസരി ഉയര്‍ത്തിപ്പിടിച്ച ഈ ആശയങ്ങള്‍ വെല്ലുവിളിക്കപ്പെടുകയാണെന്ന് അദ്ദേഹം പറഞ്ഞു. കേസരി സ്മാരകം സ്ഥിതി ചെയ്യുന്ന വടക്കന്‍ പറവൂരിലെ മാടവനപ്പറമ്പില്‍ ദക്ഷിണേന്ത്യന്‍ സാഹിത്യോത്സവത്തിന്റെ ഉദ്ഘാടനം നിര്‍വഹിക്കുകയായിരുന്നു മുഖ്യമന്ത്രി.
ആധുനിക കേരളത്തിന്റെ ചിന്താലോകം രൂപപ്പെടുത്തുന്നതില്‍ മാര്‍ഗ ദര്‍ശകമായ സംഭാവന നല്‍കിയ മഹദ് വ്യക്തിയാണ് കേസരി എ ബാലകൃഷ്ണപ്പിള്ള. കേരളത്തില്‍ ധൈഷണികമായ നവലോകം സൃഷ്ടിക്കാനും അതിനുതകുന്ന രീതിയില്‍ ആശയലോകം രൂപപ്പെടുത്താനുമാണ് കേസരി ശ്രമിച്ചത്.ആധുനികകലയ്ക്കും സാഹിത്യത്തിനും പത്രപ്രവര്‍ത്തനത്തിനും അദ്ദേഹം ഒരുപോലെ അടിത്തറയൊരുക്കി. ആദര്‍ശാധിഷ്ഠിത പത്രപ്രവര്‍ത്തനത്തിന് തുടക്കം കുറിച്ച കേസരി, അധികാരകേന്ദ്രങ്ങളെ നിര്‍ഭയമായി നേരിടുന്ന രാഷ്ട്രീയ സാംസ്‌കാരികതയുടെയും പതാകാവാഹകനായി.
പത്രപ്രവര്‍ത്തനത്തില്‍ രസിപ്പിക്കലിലൂടെ പണമുണ്ടാക്കണമെന്ന് കരുതുന്നവര്‍ ഏറിവരുന്ന കാലത്ത് കേസരിയുടെ കാഴ്ച്ചപ്പാടിന് ഏറെ പ്രധാന്യമുണ്ടെന്നും മുഖ്യമന്ത്രി പറഞ്ഞു.വി.ഡി സതീശന്‍ എം.എല്‍.എ അധ്യക്ഷത വഹിച്ചു.
എസ് ശര്‍മ്മ എം.എല്‍.എ, മലയാളം സര്‍വകലാശാല വൈസ് ചാന്‍സലര്‍ കെ ജയകുമാര്‍, സാഹിത്യോത്സവം ഡയറക്ടര്‍ സേതു, മുന്‍ എം.പി പി രാജീവ്, കൊച്ചി റിഫൈനറി മാനേജിങ് ഡയറക്ടര്‍ പ്രസാദ് എം പണിക്കര്‍, നഗരസഭ ചെയര്‍മാന്‍ രമേഷ് ഡി കുറുപ്പ്, മുന്‍ ചെയര്‍മാന്‍ എന്‍.എ അലി, ഡെന്നി തോമസ്, ഷീബ പ്രതാപന്‍ തുടങ്ങിയവര്‍ പങ്കെടുത്തു.