കൊച്ചി: ലോക്ക്ഡൗണിനെ തുടര്‍ന്ന് ലക്ഷദ്വീപിലും മാലിദ്വീപിലും കുടുങ്ങിയവരുമായുള്ള ആദ്യ യാത്രാകപ്പലുകള്‍ കൊച്ചിയിലെത്തി. ലക്ഷദ്വീപില്‍ നിന്നുള്ള എംവി അറേബ്യന്‍ സീയും മാലിദ്വീപില്‍ നിന്നുള്ള എ.എന്‍എസ് ജലശ്വയുമാണ് കൊച്ചി തീരമണഞ്ഞത്.  121 യാത്രക്കാരാണ് എംവി അറേബ്യന്‍ സീയിലുള്ളത്.

ശനിയാഴ്ച വൈകീട്ടോടെയാണ് ദ്വീപില്‍ നിന്നും കപ്പല്‍ കൊച്ചിയിലേക്ക് യാത്ര തിരിച്ചത്. സര്‍ക്കാര്‍ സര്‍വീസില്‍ ജോലി ചെയ്യുന്നവരും ആരോഗ്യ പ്രവര്‍ത്തകരുമാണ് കൂടുതലായും കപ്പലിലുള്ളത്. 250 പേര്‍ക്ക് കയറാവുന്ന കപ്പലില്‍ സാമൂഹിക അകലം പാലിക്കേണ്ടതിനാലാണ് 121 യാത്രക്കാരെ കയറ്റി യാത്ര തിരിച്ചത്.

698 യാത്രക്കാരാണ് നാവിക സേനയുടെ കപ്പലായ ഐ.എന്‍.എസ് ജലാശ്വയിലുള്ളത്. ഇന്ന് പകല്‍ 10 മണിയോടെയാണ് കപ്പല്‍ തീരത്തെത്തിയത്.

മെഡിക്കല്‍ ചെക്കപ്പ് ഉള്‍പ്പെടെ പൂര്‍ത്തിയാക്കിയ ശേഷമാകും യാത്രക്കാരെ പുറത്തെത്തിക്കുക.