കൊല്‍ക്കത്ത: ഐ.എസ്.എലിന് ശേഷം ടോപ് ടീമുകളെ ഉള്‍പ്പെടുത്തി നടത്തിയ സൂപ്പര്‍ കപ്പ് നിര്‍ത്തിയേക്കുമെന്ന് സൂചന. ആദ്യമായി നടത്തിയ സൂപ്പര്‍ കപ്പ് തന്നെ പരാജയപ്പെട്ട സാഹചര്യത്തിലാണ് ഇനി സൂപ്പര്‍ കപ്പ് നടത്തേണ്ടതില്ലെന്ന തീരുമാനത്തിലെത്തിയത്.
സീസണിന്റെ അവസാനം പുതിയൊരു ടൂര്‍ണമെന്റ് വയ്ക്കുന്നതിനെ പരിശീലകരും മറ്റും എതിര്‍ത്തിരുന്നു. സൂപ്പര്‍ കപ്പ് വന്‍ സാമ്പത്തിക ബാധ്യതയാണ് ക്ലബുകള്‍ക്ക് നല്‍കുന്നതെന്ന് മിനര്‍വ പഞ്ചാബ് ഉടമ പറഞ്ഞിരുന്നു. ഇതിനെ തുടര്‍ന്ന് ടീം സൂപ്പര്‍ കപ്പില്‍നിന്ന് പിന്മാറുകയാണെന്നും ടീം ഉടമ അറിയിച്ചിരുന്നു.
ഒരാവശ്യവും ഇല്ലാത്ത ടൂര്‍ണമെന്റാണിതെന്നായിരുന്നു ജംഷഡ്പുര്‍ പരിശീലകന്‍ സ്റ്റീവ് കോപ്പലിന്റെ വാദം. വിജയിച്ചത് കൊണ്ട് പ്രത്യേകിച്ച് നേട്ടമൊന്നുമില്ലാത്ത കപ്പ് എന്തിനാണ് നടത്തുന്നതെന്നായിരുന്നു പൊതുവികാരം.
ഫെഡറേഷന്‍ കപ്പിന് പകരമായിട്ടായിരുന്നു സൂപ്പര്‍ കൊണ്ട് വന്നത്. പക്ഷെ നിലവിലെ അവസ്ഥയില്‍ സൂപ്പര്‍ കപ്പുമായി മുന്നോട്ടുപോവാനാവില്ല എന്നാണ് എ.ഐ.എഫ്.എയുടെ അഭിപ്രായം.