കണ്ണൂര്‍: കണ്ണൂര്‍, തളിപ്പറമ്പ്, പയ്യന്നൂര്‍ താലൂക്കുകളിലുള്ളവര്‍ക്ക് ആര്‍.ഡി.ഒ സേവനങ്ങള്‍ക്കായി ഇനി തലശ്ശേരിയിലേക്ക് പോവേണ്ട. തളിപ്പറമ്പ് മിനിസിവില്‍ സ്റ്റേഷനില്‍ ഉദ്ഘാടനം ചെയ്ത തളിപ്പറമ്പ് റവന്യൂ ഡിവിഷന്‍ പൂര്‍ണതോതില്‍ പ്രവര്‍ത്തനം തുടങ്ങി.
നിലവിലെ ആര്‍.ഡി.ഒ രവികുമാറിനു പുറമെ സബ് കലക്ടറായി കണ്ണൂര്‍ അസിസ്റ്റന്റ് കലക്ടര്‍ അര്‍ജുന്‍ പാണ്ഡ്യന്‍ ചുമതലയേറ്റു. ഇതുവരെ തലശ്ശേരിയില്‍ നിന്നു ലഭിച്ചിരുന്ന മുഴുവന്‍ സേവനങ്ങളും തളിപ്പറമ്പ് ഓഫിസില്‍ ലഭിക്കും. രക്ഷിതാക്കളുടെയും മുതിര്‍ന്ന പൗരന്‍മാരുടെയും ക്ഷേമം സംബന്ധിച്ച ട്രൈബ്യൂണല്‍ നടപടികള്‍, നെല്‍വയല്‍ തണ്ണീര്‍ത്തട സംരക്ഷണ നിയമപ്രകാരമുള്ള ഡാറ്റാ ബാങ്കുമായി ബന്ധപ്പെട്ട വിഷയങ്ങള്‍, കാലതാമസം സംഭവിച്ച ജനന-മരണ രജിസ്‌ട്രേഷനുകള്‍ക്കുള്ള എന്‍.ഒ.സി, ഒരു ലക്ഷം രൂപയ്ക്കു മുകളിലുള്ള ഉപയോഗശൂന്യമായ മുദ്രപത്രങ്ങളുടെ വില തിരികെ ലഭിക്കുന്നതിനുള്ള നടപടികള്‍ തുടങ്ങിയ സേവനങ്ങള്‍ തളിപ്പറമ്പ് റവന്യൂ ഡിവിഷന്‍ ഓഫിസില്‍ നിന്നു ലഭിക്കും.  107-ാം വകുപ്പ് പ്രകാരം സമാധാന പാലനത്തിനും നല്ല നടപ്പിനുമുള്ള ജാമ്യം ഉറപ്പുവരുത്തല്‍, 133-ാം വകുപ്പ് പ്രകാരം പൊതുജന ശല്യങ്ങള്‍ നീക്കുന്നതിനുള്ള നടപടികള്‍, 174-ാം വകുപ്പ് പ്രകാരമുള്ള അസ്വാഭാവിക മരണവുമായി ബന്ധപ്പെട്ട നടപടികള്‍ എന്നിവയും സബ് ഡിവിഷനല്‍ മജിസ്‌ട്രേറ്റ് എന്ന നിലയില്‍ തളിപ്പറമ്പ് റവന്യൂ ഓഫിസില്‍ കൈകാര്യം ചെയ്യും. തഹസില്‍ദാര്‍മാര്‍ നല്‍കുന്ന സര്‍ട്ടിഫിക്കറ്റുകള്‍, കെട്ടിടനികുതി, പോക്കുവരവ്, ഭൂനികുതി തുടങ്ങിയ വിഷയങ്ങളിലുള്ള പരാതികളുടെ അപ്പീല്‍ അധികാരി ആര്‍.ഡി.ഒ ആണ്.  ഒരു സീനിയര്‍ സൂപ്രണ്ട്, രണ്ട് ജൂനിയര്‍ സൂപ്രണ്ടുമാര്‍, ഒരു സി.എ, 12 ക്ലര്‍ക്കുമാര്‍, രണ്ടു ടൈപ്പിസ്റ്റുകള്‍, രണ്ട് ഓഫിസ് അറ്റന്‍ഡന്റുമാര്‍, ഒരു അറ്റന്‍ഡര്‍ എന്നിവരുള്‍പ്പെടെ 24 ജീവനക്കാരുമുണ്ട്. അടുത്തമാസം മുതല്‍ തളിപ്പറമ്പിലും ഇ ഓഫിസ് സംവിധാനം ഏര്‍പ്പെടുത്തുമെന്ന് ജില്ലാ കലക്ടര്‍ മീര്‍ മുഹമ്മദലി അറിയിച്ചു. കണ്ണൂര്‍, തളിപ്പറമ്പ്, പയ്യന്നൂര്‍ താലൂക്കുകളിലുള്ളവര്‍ മേല്‍ ആവശ്യങ്ങള്‍ക്കായി തളിപ്പറമ്പ് റവന്യൂ ഡിവിഷന്‍ ഓഫിസിനെയാണ് സമീപിക്കേണ്ടതെന്നും ജില്ലാ കലക്ടര്‍ അറിയിച്ചു. ഫോണ്‍: 04602 300332.