മലപ്പുറം: കേരളത്തിലും പശുവിനെ അറുക്കാന്‍ സമ്മതിക്കില്ലെന്ന ബി.ജെ.പി സംസ്ഥാന സെക്രട്ടറി കെ സുരേന്ദ്രന്റെ പ്രസ്താവനയില്‍ നിന്നും ഒഴിഞ്ഞുമാറി പ്രസിഡന്റ് കുമ്മനം രാജശേഖരന്‍.

സുരേന്ദ്രന്റെ പ്രസ്താവന താന്‍ കേട്ടിട്ടില്ലെന്നു അദ്ദേഹം മലപ്പുറത്ത് പറഞ്ഞു. കേരളത്തിലെവിടെയും പശുവിനെ അറുക്കാന്‍ സമ്മതിക്കില്ലെന്നു പറഞ്ഞ സുരേന്ദ്രന്‍ കഴിഞ്ഞ ദിവസം മലപ്പുറത്ത് സ്വകാര്യ ചാനല്‍ പരിപാടിയില്‍ അറുക്കുന്നവരെ വെല്ലുവിളിച്ചിരുന്നത് സംബന്ധിച്ച ചോദ്യത്തിനു മറുപടിയായി പറഞ്ഞു.

ബീഫ് കഴിക്കുന്നവരുടെ വോട്ട് വേണ്ടായെന്നു പറയുമോ എന്ന മാധ്യമ പ്രവര്‍ത്തകരുടെ ചോദ്യത്തിനോടും കുമ്മനം ഒഴിഞ്ഞുമാറി. മലപ്പുറത്ത് ബി.ജെ.പിക്കെതിരെ ശിവസേന പിന്തുണയുള്ള മറ്റൊരു സ്ഥാനാര്‍ഥി മല്‍സരിക്കുന്നത് തിരിച്ചടിയാവില്ല. ജിഷ്ണുവിന്റെ അമ്മക്ക് സാമൂഹ്യ നീതി ഉറപ്പാക്കുന്നതിനു കരാര്‍ എഴുതേണ്ട അവസ്ഥയാണ് കേരളത്തിലേത്.

കോണ്‍ഗ്രസ് നേതാക്കളുമായി പാര്‍ട്ടി വിടുന്നവരുടെ കാര്യം ചര്‍ച്ച ചെയ്തിട്ടില്ല. സി.പി.എമ്മുകാരും പാര്‍ട്ടി വിട്ടുപോകുമോയെന്ന പേടിയാണ് കോടിയേരിക്കെന്നും അദ്ദേഹം പറഞ്ഞു.