താമരശ്ശേരി: പുതുപ്പാടി പഞ്ചായത്ത് പ്രസിഡന്റായി എല്‍.ഡി.എഫിലെ പി.ആര്‍ രാഗേഷിനെ തെരഞ്ഞെടുത്തു. പഞ്ചായത്ത് ഹാളില്‍ നടന്ന തെരഞ്ഞെടുപ്പില്‍ മുന്‍ പ്രസിഡന്റ് അംബിക മംഗലത്തിനെ ഒന്‍പതിനെതിരേ 12 വോട്ടുകള്‍ക്ക് തോല്‍പിച്ചാണ് രാഗേഷ് വിജയിച്ചത്. റിട്ടേണിങ് ഓഫിസര്‍ പി. ശാലിനി തെരഞ്ഞെടുപ്പ് നിയന്ത്രിച്ചു.
ഇതോടെ ഇടതുമുന്നണി അധികാരത്തിലിരിക്കുന്ന ഇവിടെ പ്രസിഡന്റ് സ്ഥാനവും അവര്‍ക്ക് സ്വന്തമായി. 21 അംഗ ഭരണസമിതിയില്‍ ഭൂരിപക്ഷം ലഭിച്ചെങ്കിലും എസ്.സി അംഗം ഇല്ലാത്തതിനെ തുടര്‍ന്ന് നഷ്ടപ്പെട്ട പ്രസിഡന്റ് സ്ഥാനത്തേക്ക് എസ്.സി അംഗത്തെ വിജയിപ്പിച്ചാണ് എല്‍.ഡി.എഫ് കസേര തിരിച്ചുപിടിച്ചത്. വെസ്റ്റ് കൈതപ്പൊയില്‍ വാര്‍ഡില്‍നിന്നു പി.കെ ജൈസലിനെ രാജിവയ്പ്പിച്ചാണ് ഉപതെരഞ്ഞെടുപ്പ് നടത്തിയത്.