താമരശേരി: കരിഞ്ചോല മലയിലെ ഉരുള്‍പൊട്ടലില്‍ തകര്‍ന്ന വൈദ്യുതി ലൈനുകളും ട്രാന്‍സ്‌ഫോര്‍മറുകളും മാറ്റി സ്ഥാപിച്ചു. ഒരാഴ്ചയോളമായി കെ.എസ്.ഇ.ബിയുടെ കഠിനപ്രയത്‌നത്തിന്റെ ഭാഗമായാണ് തകര്‍ന്ന നിരവധി ലൈനുകളും ട്രാന്‍സ്‌ഫോര്‍മറുകളും മാറ്റി സ്ഥാപിക്കാന്‍ സാധിച്ചത്. കനത്ത കാറ്റിലും മഴയിലും മറ്റിടങ്ങളില്‍കൂടി വൈദ്യുതി തകരാറിലാവുകയും സമയബന്ധിതമായി ഇവ നന്നാക്കുകയും ചെയ്യുന്നതിനിടക്ക് തന്നെയാണ് വലിയ നഷ്ടങ്ങള്‍ സംഭവിച്ച കരിഞ്ചോലയിലെ തകരാറും പരിഹരിച്ചത്.നിരവധി വൈദ്യുതിക്കാലുകളും ട്രാന്‍സ്‌ഫോര്‍മറുകളും അപകടത്തില്‍ തകര്‍ന്നിരുന്നു. പത്തുലക്ഷത്തോളം രൂപയുടെ നാശനഷ്ടം കെ.എസ്.ഇ.ബിക്ക് സംഭവിച്ചു. അപകടത്തിന് ശേഷം ഇവിടെ ഇതുവരെ വൈദ്യുതി ഉണ്ടായിട്ടില്ല. അറ്റകുറ്റപ്പണികള്‍ക്ക് ശേഷം ഇന്ന് രാവിലെയോടെ വൈദ്യുതി ചാര്‍ജ് ചെയ്യുമെന്ന് താമരശേരി കെ.എസ്.ഇ.ബി അസിസ്റ്റന്റ് എന്‍ജിനീയര്‍ അബ്ദുല്‍ ജലീല്‍ അറിയിച്ചു.