മട്ടാഞ്ചേരി: ഇന്ത്യന്‍ നാവിക സേനയുടെ സമുദ്രസേതു രക്ഷാദൗത്യത്തിന്റെ ഭാഗമായുള്ള രണ്ടാമത്തെ കപ്പല്‍ കൊച്ചി തുറമുഖത്തെത്തി.

ഐ.എന്‍.എസ് മഗര്‍ എന്ന യുദ്ധ കപ്പലാണ് മാലദ്വീപില്‍നിന്നുള്ള 202 പ്രവാസി യാത്രക്കാരുമായി ഇന്നലെ വൈകിട്ട് ആറു മണിയോടെ കൊച്ചി തുറമുഖത്തെ ബി.ടി.പി ബര്‍ത്തില്‍ അടുത്തത്.

ഞായറാഴ്ച നേവിയുടെ ഐ.എന്‍.എസ് ജലാശ്വയില്‍ 698 പ്രവാസികളെ നാട്ടിലെത്തിച്ചിരുന്നു. മഗറില്‍ 178 പുരുഷന്‍മാരും 24 സ്ത്രീകളുമാണുള്ളത്.

പത്തുവയസില്‍ താഴെ പ്രായമുള്ള മൂന്ന് കുട്ടികളും ഗര്‍ഭിണികളും വിവിധ രോഗങ്ങള്‍ക്ക് ചികില്‍സയിലുള്ളവരുമായ പതിനെട്ട് പേരുമാണുള്ളത്.

സംസ്ഥാനത്തുനിന്നുള്ള 91 പേരാണ് കപ്പലില്‍ ഉള്ളത്. കേരളം കഴിഞ്ഞാല്‍ തമിഴ്‌നാട്ടില്‍ നിന്നുള്ളവരാണ് കൂടുതല്‍-83. കേരളത്തിനു പുറമേ പതിനാറ് സംസ്ഥാനങ്ങള്‍, കേന്ദ്ര ഭരണപ്രദേശങ്ങളില്‍നിന്നുള്ളവരും രണ്ടാംഘട്ട കപ്പലിലുണ്ട്.