അരീക്കോട്: എളയൂര്‍ മല്‍ജഉല്‍ ഐതാം  യതീംഖാനയിലെ ഉമര്‍ ഉസ്താദിന്റെ മരണത്തിലൂടെ നാടിനും യതീംഖാനക്കും നഷ്ടമായത് അനാഥകള്‍ക്കായി ജീവിതം ഒഴിഞ്ഞുവെച്ച നിസ്വാര്‍ഥ സേവകനെ. മൂന്ന് പതിറ്റാണ്ട് മുമ്പാണ് ഉമര്‍ മുസ്‌ലിയാര്‍  അനാഥയായി സ്ഥാപനത്തിലേക്ക് കടന്നു വന്നത്. അവിടെ പഠിച്ചു സ്ഥാപനത്തിലെ ദൈനംദിന കാര്യങ്ങളിലും നടത്തിപ്പിലും പുരോഗതിയിലും ശ്രദ്ധയാലുവായ  സേവകനായി മാറുകയായിരുന്നു. യതീംഖാന യു.പി സ്‌കൂള്‍ സ്റ്റാഫായി സേവനം ചെയ്യുന്നതിനിടക്കാണ് അര്‍ബുദ രോഗം ബാധിച്ചത്.  ഇതെ തുടര്‍ന്ന് ചികിത്സയിലായിരുന്നു.  ഇന്നലെയാണ് ഉമര്‍ മുസ്‌ലിയാര്‍ മരണപ്പെട്ടത്.
എളയൂര്‍ യതീംഖാനയിലേക്ക്  കേരളത്തിലെ തന്നെ പ്രമുഖ സ്ഥാപന മേധാവികളെയും  ഉന്നതരുമായ നിരവധി ആളുകളെയും എത്തിക്കുന്നതില്‍  ഉമര്‍ ഉസ്താദ് വലിയ പങ്കുവഹിച്ചിരുന്നു. നിസ്വാര്‍ത്ഥവും എളിമയോടെയുമുള്ള ഇടപഴകല്‍ ഉസ്താദിനെ മറ്റുള്ളവരില്‍ നിന്നും വ്യത്യസ്തനാക്കി.
ഒരു വാത്സല്യനിധിയായ പിതാവിനെ നഷ്ടപെട്ട ദു:ഖത്തിലാണ് എളയൂര്‍ യതീംഖാനയിലെ വിദ്യാര്‍ഥികള്‍. ഒരു പിതാവിനോടെന്ന പോലെ ആര്‍ക്കും ഉമര്‍ ഉസ്താദിനെ സമീപിക്കാമായിരുന്നു. എന്തിനും പരിഹാരം ഉടന്‍ ഉണ്ടാകുമായിരുന്നു. കഴിഞ്ഞ 35 വര്‍ഷമായി സ്ഥാപനത്തിലെ ഓരോ ചലനത്തിലും ഉമര്‍ ഉസ്താദിന്റെ സാനിധ്യമുണ്ട്. ഉസ്താദിന്റെ മരണത്തോടെ സ്ഥാപനത്തിന് നഷ്ടമായത് പകരം വയ്ക്കാനില്ലാത്ത നിസ്വാര്‍ഥ സേവകനെയാണെന്ന് യതീംഖാന  സെക്രട്ടറി കെ.ടി മുഹമ്മദലി മാസ്റ്റര്‍, മാനേജര്‍ എം.കെ മാനു ഹാജി എന്നിവര്‍ സംയുക്ത പ്രസ്ഥാവനയില്‍ പറഞ്ഞു. ആയിരക്കണക്കിന് ആളുകള്‍ ഉമര്‍ ഉസ്താദിന് യാത്രമൊഴി നല്‍കി. ചിറപ്പാലം ജുമാമസ്ജിദില്‍ ഖബറടക്കം നടന്നു. ജനാസ നമസ്‌കാരത്തിന് പി.എം.എസ് തങ്ങള്‍ ഫൈസി തുവ്വൂര്‍ നേതൃത്വം നല്‍കി.