ന്യൂഡല്‍ഹി: ലോക്‌സഭാ തിരഞ്ഞെടുപ്പിലേക്കുള്ള സ്ഥാനാര്‍ഥികളുടെ ആദ്യ പട്ടിക കോണ്‍ഗ്രസ് പ്രഖ്യാപിച്ചു. ആദ്യ പട്ടികയില്‍ 15 പേരാണ് ഇടം പിടിച്ചത്. ഉത്തര്‍ പ്രദേശിലേയും ഗുജറാത്തിലേയും 15 മണ്ഡലങ്ങളിലേക്കുള്ള സ്ഥാനാര്‍ഥികളെയാണ് പ്രഖ്യാപിച്ചത്. യു.പിയിലെ നാലു സീറ്റിലും ഗുജറാത്തിലെ 11 സീറ്റിലേക്കുമുള്ളവരുടെ പേരുകളാണ് ഇതില്‍ ഇടം പിടിച്ചത്.

 പ്രധാനമന്ത്രി സ്ഥാനത്തേക്കു പരിഗണിക്കുന്ന കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി അമേഠ്യയില്‍ നിന്നുതന്നെ ജനവിധി തേടും. സോണിയാ ഗാന്ധി റായ്ബലേറിയയിലും മത്സരിക്കും. ഫാറൂഖാബാദില്‍ നിന്ന് സല്‍മാന്‍ ഖുര്‍ഷിദും മത്സരിക്കും. ഇവരാണ് ആദ്യ പതിനഞ്ച് പേരിലെ പ്രമുഖര്‍.

അതിനിടെ മുന്‍ പ്രധാനമന്ത്രി മന്‍മോഹന്‍ സിംഗിനെ രംഗത്തിറക്കാനും കോണ്‍ഗ്രസില്‍ ചര്‍ച്ച നടക്കുന്നുണ്ട്. ഈ ആവശ്യം അദ്ദേഹത്തെ അറിയിച്ചതായാണ് വിവരം. അമൃതസറില്‍ നിന്ന് ജനവിധി തേടാനാണ് അദ്ദേഹത്തോട് പാര്‍ട്ടി ആവശ്യപ്പെട്ടിരിക്കുന്നത്. എന്നാല്‍ അദ്ദേഹമിതിന് വഴങ്ങുമോ എന്നറിവായിട്ടില്ല.