ശ്രീകണ്ഠപുരം: തളിപ്പറമ്പില്‍ നിന്നു ശ്രീകണ്ഠപുരത്തേക്ക് അമിതവേഗതയില്‍ മത്സരിച്ചോടിയ രണ്ടു സ്വകാര്യബസുകള്‍ പരിപ്പായിയില്‍ നാട്ടുകാര്‍ തടഞ്ഞു. ഇന്നലെ ഉച്ചയോടെ തളിപ്പറമ്പില്‍ നിന്നു ഇരിട്ടിയിലേക്ക് പോവുകയായിരുന്ന ജെയ്‌സണ്‍ ബസും തളിപ്പറമ്പ്- ശ്രീകണ്ഠപുരം-ചെമ്പേരി റൂട്ടിലോടുന്ന എം.പി.എസ് ബസുമാണ് തടഞ്ഞത്. ബസുകള്‍ മത്സരയോട്ടം നടത്തുന്നതിനിടെ ഭയചകിതരായ യാത്രക്കാര്‍ ബഹളംവച്ചതോടെയാണ് നാട്ടുകാര്‍ ഇടപെട്ടത്. തുടര്‍ന്ന് അരമണിക്കൂറോളം ഇവിടെ ഗതാഗതം സ്തംഭിച്ചു. വിവരമറിഞ്ഞ് ശ്രീകണ്ഠപുരം സി.ഐ വി.വി ലതീഷിന്റെ നേതൃത്വത്തിലുള്ള  സംഘം സ്ഥലത്തെത്തി ഇരു ബസുകളും കസ്റ്റഡിയിലെടുത്തു.