പൂനെ: ഐ.എസ്.എല്ലില്‍ ഇന്നലെ നടന്ന ആദ്യ സെമിയില്‍ ബംഗളൂരു എഫ്.സിക്ക് തോല്‍വി. നോര്‍ത്ത് ഈസ്റ്റ് യുനൈറ്റഡാണ് 2-1 എന്ന സ്‌കോറിന് ബംഗളൂരുവിനെ പരാജയപ്പെടുത്തിയത്. ഇതോടെ ഇരു പാദങ്ങളിലായി നടക്കുന്ന സെമിയുടെ ആദ്യ മത്സരത്തില്‍ നോര്‍ത്ത് ഈസ്റ്റ് മുന്നിലെത്തി. 20-ാം മിനുട്ടില്‍ റിഡീം ത്‌ലാങ്ങിന്റെ ഗോളിലൂടെ നോര്‍ത്ത് ഈസ്റ്റ് യുനൈറ്റഡാണ് മുന്നിലെത്തിയത്. ഏറെ നേരത്തെ പോരാട്ടത്തിനൊടുവില്‍ ഹെര്‍ണാണ്ടസിന്റെ ഗോളിലൂടെ 82-ാം മിനുട്ടില്‍ ബംഗളൂരു സമനില പിടിച്ചു. മത്സരം സമനിലയില്‍ അവസാനിക്കും എന്ന് തോന്നുന്നതിനിടെയായിരുന്നു 95-ാം മിനുട്ടില്‍ പെനാല്‍റ്റി പിറന്നത്. ഫ്രീകിക്കിനിടെ നോര്‍ത്ത് ഈസ്റ്റ് താരത്തെ ബോക്‌സില്‍ വീഴ്ത്തിയതിനായിരുന്നു റഫറി പെനാല്‍റ്റി വിധിച്ചത്. കിക്കെടുത്ത യുവാന്‍ മാസിയക്ക് പിഴച്ചില്ല. 11ന് നടക്കുന്ന രണ്ടാം പാദത്തില്‍ ഗോള്‍ വഴങ്ങാതിരുന്നാല്‍ നോര്‍ത്ത് ഈസ്റ്റിന് ഫൈനലിലെത്താം. നോര്‍ത്ത് ഈസ്റ്റിനെ രണ്ട് ഗോളിനെങ്കിലും പരാജയപ്പെടുത്തിയാല്‍ മാത്രമേ ബംഗളൂരുവിന് ഫൈനലിലെത്താന്‍ കഴിയൂ.