തിരുവനന്തപുരം: ബംഗാള്‍ ഉള്‍ക്കടലില്‍ വീണ്ടും ന്യൂനമര്‍ദം രൂപപ്പെട്ടെന്ന് കാലാവസ്ഥാ നിരീക്ഷണ കേന്ദ്രം.
തെക്കുകിഴക്ക് ബംഗാള്‍ ഉള്‍ക്കടലില്‍ ഇന്നലെ രാവിലെയോടെ രൂപപ്പെട്ട ന്യൂനമര്‍ദം നാളെയോടെ ശക്തിപ്രാപിക്കുമെന്നും ശനിയാഴ്ച വൈകിട്ടോടെ ചുഴലിക്കാറ്റായി മാറുമെന്നുമാണ് പ്രവചനം. നിലവിലെ സാഹചര്യത്തില്‍ കേരളത്തെ ബാധിക്കാനിടയില്ലെങ്കിലും കേരള ചീഫ് സെക്രട്ടറിക്കുള്‍പ്പെടെ ഇതുസംബന്ധിച്ച അടിയന്തര സന്ദേശം കേന്ദ്ര കാലാവസ്ഥാനിരീക്ഷണ വകുപ്പ് അയച്ചിട്ടുണ്ട്. തമിഴ്‌നാട്, പുതുച്ചേരി തീരത്ത് ഞായറാഴ്ച വരെ മത്സ്യബന്ധനം പാടില്ലെന്നും നിര്‍ദേശമുണ്ട്.
അതേസമയം, സംസ്ഥാനത്ത് അടുത്ത അഞ്ചുദിവസവും വേനല്‍മഴ തുടരും.
ഇന്ന് ഇടുക്കി ജില്ലയിലും നാളെ ഇടുക്കി, മലപ്പുറം ജില്ലയിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്. ശനിയാഴ്ച എറണാകുളം, ഇടുക്കി, തൃശൂര്‍, പാലക്കാട് ജില്ലകളിലും യെല്ലോ അലര്‍ട്ടുണ്ട്. ശക്തമായ ഇടിമിന്നലിനും സാധ്യതയുണ്ട്. ഇന്ന് കേരളതീരത്തും മത്സ്യബന്ധനം പാടില്ലെന്ന് മുന്നറിയിപ്പുണ്ട്.