റിയാദ്: "പവിത്ര മാസം പരീക്ഷണങ്ങൾക്ക് പരിഹാരം" എന്ന ശീർഷകത്തിൽ സമസ്‌ത ഇസ്‌ലാമിക് സെന്റർ സഊദി നാഷണൽ കമ്മിറ്റിയുടെ നേതൃത്വത്തിൽ നടക്കുന്ന ക്യാമ്പയിനിന്റെ ഭാഗമായുള്ള ഖുർആൻ മുസാബഖ മത്സരങ്ങളുടെ നാഷണൽ  തല മത്സരം വെള്ളി, ശനി ദിവസങ്ങളിലായി നടക്കും. നേരത്തെ, വിവിധ സെൻട്രൽ കമ്മിറ്റികൾ നടത്തിയ സബ്‌ജൂനിയർ, ജൂനിയർ, സീനിയർ, ജനറൽ, ഉലമ വിഭാഗം എന്നിങ്ങനെ അഞ്ചു വിഭാഗങ്ങളിലായുള്ള മത്സരങ്ങളിലെ ഒന്ന്, രണ്ട് വിജയികളാണ് നാഷണൽ തല മത്സരത്തിലേക്ക് അർഹത നേടിയത്. ഓൺലൈൻ വഴിയുള്ള മത്സര പരിപാടിക്ക് ഒരുക്കങ്ങൾ പൂർത്തിയായിട്ടുണ്ട്. 

      റമദാൻ 22 ന് (മെയ് 15) വെളളി  ഉച്ചക്ക് 2 മണിമുതൽ  സബ് ജൂനിയർ , ജൂനിയർ വിഭാഗങ്ങളുടെയും, രാത്രി 10 മണിമുതൽ  സീനിയർ വിഭാഗത്തിന്റെയും മത്സരങ്ങളും റമദാൻ 23 ന് (മെയ് 16) ശനിയാഴ്ച ഉച്ചക്ക് 2 മണി മുതൽ  ജനറൽ, ഉലമ വിഭാഗങ്ങളുടെതുമായി മൊത്തം അഞ്ച് വിഭാഗങ്ങളുടെ മത്സരങ്ങൾ രണ്ട് ദിവസങ്ങളിലായി വ്യത്യസ്ത സമയങ്ങളിലായാണ് സജ്ജീകരിച്ചിട്ടുള്ളത്.

      മുജവ്വിദീങ്ങളായ ജഡ്‌ജസുമാരുടെയും കോഡിനേറ്റർമാരുടെയും മേൽനോട്ടത്തിലാണ് മത്സരങ്ങൾ നടക്കുകയെന്നും ഇതിനായുള്ള പ്രത്യേക സമിതിയുടെ നിയമങ്ങൾക്കനുസരിച്ചായിരിക്കും മത്സരം നടക്കുകയെന്നും ചെയർമാൻ സൈദലവി ഫൈസി പനങ്ങാങ്ങര കൺവീനർ നൗഷാദ് അൻവരി മോളൂർ എന്നിവർ അറിയിച്ചു.