ജനീവ: കൊവിഡ് വ്യാപനത്തില്‍ പുതിയ മുന്നറിയിപ്പുമായി ലോകാരോഗ്യ സംഘടന. ഈ മഹാമാരി ചിലപ്പോള്‍ ലോകത്തെ വിട്ടുപോകില്ലെന്നാണ് കഴിഞ്ഞ ദിവസം ലോകാരോഗ്യ സംഘടനയുടെ എമര്‍ജന്‍സി വിഭാഗം ഡയരക്ടര്‍ ഡോ. മൈക് റയാന്‍ പറഞ്ഞത്. 

എച്ച്.ഐ.വിയെപ്പോലെ ഈ വൈറസിനോടും ലോകം പൊരുത്തപ്പെട്ടു ജീവിക്കേണ്ടിവരുമെന്നും അദ്ദേഹം പറഞ്ഞു. രോഗത്തിനു വേഗത്തില്‍ മരുന്ന് കണ്ടുപിടിക്കേണ്ടത് അത്യാവശ്യമാണെന്നാണ് ഇതു വ്യക്തമാക്കുന്നത്. കൊവിഡിനെ പ്രതിരോധിക്കാന്‍ വാക്‌സിന്‍ കണ്ടുപിടിച്ചാലും വൈറസിനെ പൂര്‍ണമായി നിയന്ത്രിക്കുന്നതു പ്രയാസകരമാണെന്നാണ് ഇന്നലെ ലോകാരോഗ്യ സംഘടന വ്യക്തമാക്കിയത്. വൈറസ് എപ്പോള്‍ അപ്രത്യക്ഷമാകുമെന്ന് ആര്‍ക്കും നിരീക്ഷിക്കാനാകില്ലെന്നും മൈക് റയാന്‍ വ്യക്തമാക്കി. 

നേരത്തെ, വൈറസ് കാരണം രാജ്യങ്ങള്‍ ഏര്‍പ്പെടുത്തിയ നിയന്ത്രണങ്ങളില്‍ ഇളവ് വരുത്തുന്നതിന് മുന്‍പ് രണ്ടുവട്ടം ആലോചിക്കണമെന്ന് ലോകാരോഗ്യ സംഘടന നിര്‍ദേശിച്ചിരുന്നു. 

കൊവിഡ് ബാധ ആളുകളുടെ മാനസികാരോഗ്യത്തെയും ബാധിക്കുമെന്നും അതിനു ഫലപ്രദമായ ചികിത്സ നല്‍കുന്നതിന് രാജ്യങ്ങള്‍ നടപടി സ്വീകരിക്കണമെന്നും ഐക്യരാഷ്ട്രസഭയും നിര്‍ദേശിച്ചിട്ടുണ്ട്.