ദോഹ: ഖത്തര്‍ ഫൌണ്ടേഷന്‍ സംഘടിപ്പിച്ച നാലാമത് രാജ്യാന്തര അറബിക് ഡിബേറ്റ് ചാംപ്യന്‍ഷിപ്പില്‍ ദാറുല്‍ ഹുദാ ഇസ്‌ലാമിക് സര്‍വകലാശാലക്ക് മികച്ച വിജയം. പാകിസ്താനിലെ ഇന്റര്‍നാഷനല്‍ ഇസ്‌ലാമിക് യൂനിവേഴ്‌സിറ്റി, മാലിദ്വീപ് ഇസ്‌ലാമിക് യൂനിവേഴ്‌സിറ്റി, ബള്‍ഗേറിയ യൂനിവേഴ്‌സിറ്റി, ഇന്തോനേഷ്യന്‍ ഇസ്‌ലാമിക് യൂനിവേഴ്‌സിറ്റി തുടങ്ങിയ സര്‍വകലാശാലകളെ പരാജയപ്പെടുത്തിയാണ് അറബ്
ഇതര സര്‍വകലാശാലകളുടെ കൂട്ടത്തില്‍ ദാറുല്‍ ഹുദാ കഴിവുതെളിയിച്ചത്.
ഏഷ്യ, ആഫ്രിക്ക, യൂറോപ്പ്, ആസ്‌ത്രേലിയ, അമേരിക്ക ഭൂഖണ്ഡങ്ങളില്‍ നിന്നായി 46 രാജ്യങ്ങളിലെ സര്‍വകലാശാലകളാണ് ചാംപ്യന്‍ഷിപ്പില്‍ മാറ്റുരച്ചത്. മത്സരിച്ച അഞ്ചു റൗണ്ടുകളില്‍ നാലിലും വിജയിച്ച് ഇന്ത്യന്‍ സര്‍വകലാശാലകളുടെ ഗണത്തിലും ദാറുല്‍ ഹുദാ ഒന്നാമതെത്തി. കാലിക്കറ്റ് യൂനിവേഴ്‌സിറ്റി രണ്ടാം സ്ഥാനവും ഡല്‍ഹി ജവാഹര്‍ലാല്‍ നെഹ്‌റു യൂനിവേഴ്‌സിറ്റി മൂന്നാം സ്ഥാനവും നേടി.
ഡിഗ്രി വിദ്യാര്‍ഥികളായ ഖമറുല്‍ ഫാരിസ് പൂക്കിപ്പറമ്പ്, ആശിഖുര്‍റഹ്മാന്‍ കാളികാവ്, മുസ്തഫ പൂനൂര്‍, മുഹമ്മദ് കെ. ചേലക്കാട് എന്നിവരാണ് ദാറുല്‍ ഹുദാ ടീമിലുണ്ടായിരുന്നത്. വിദൂരപഠനവിഭാഗം പഠിതാക്കളായ രണ്ടു ദാറുല്‍ഹുദാ വിദ്യാര്‍ഥികളാണ് കാലിക്കറ്റ് സര്‍വകലാശാലയെയും പ്രതിനിധീകരിച്ചിരുന്നത്.