തെഹ്‌റാൻ: ഇറാൻ റെവല്യുഷനറി ഗാർഡ് നേതാവ് സിറിയയിൽ ഐ എസ് ചെയ്‌ത സ്‌ഫോടനത്തിൽ കൊല്ലപ്പെട്ടു. റെവല്യുഷനറി ഗാർഡ് കമാണ്ടർ അബുൽഫസൽ സർലക് ആണ് സിറിയയിലെ കിഴക്കൻ അലപ്പോയിൽ ഐ എസ് ആസൂത്രണം ചെയ്‌ത സ്‌ഫോടനക്കെണിയിൽ പെട്ട് കൊല്ലപ്പെട്ടതെന്ന് ഇറാൻ ഭാഗിക ഔദ്യോഗിക വാർത്താ ഏജൻസിയായ മെഹർ ന്യൂസ് റിപ്പോർട്ട് ചെയ്‌തു. അലപ്പോയിലെ ഖനാസിറിൽ നടന്ന സംഘട്ടനത്തിലാണ് ഇദ്ദേഹം കൊല്ലപ്പെട്ടതെന്ന് ഇറാനിലെ മറ്റൊരു ഭാഗിക ഔദ്യോഗിക വാർത്താ ഏജൻസിയായ ഫാർസ് ന്യൂസും റിപ്പോർട്ട് ചെയ്‌തു.

     സിറിയ, ഇറാഖ് എന്നിവിടങ്ങളിൽ ഇറാൻ അനുകൂല സംഘടനകളെ നിയന്ത്രിച്ചിരുന്നത് ഇദ്ദേഹമായിരുന്നു. സിറിയയിലെ അലപ്പോയിൽ ഭാര്യയും രണ്ടു കുട്ടികളുമൊടൊപ്പം വസിച്ചാണ് ഇദ്ദേഹം നിയന്ത്രിച്ചിരുന്നത്. റെവല്യുഷനറി ഗാർഡ് അലപ്പോയിലെ ആസ്ഥാന കേന്ദ്രത്തിലെ ചുമതലയും ഇദ്ദേഹത്തിനായിരുന്നു. നേരത്തെ ഇറാഖിൽ അമേരിക്കൻ ആക്രമണത്തിൽ കൊല്ലപ്പെട്ട ഇറാൻ കമാണ്ടർ ഖാസിം സുലൈമാനിയുമായി അടുത്ത ബന്ധമുള്ള നേതാവ് കൂടിയായിരുന്നു ഇദ്ദേഹം.