ന്യൂഡല്‍ഹി: ഇന്ധന വിലയില്‍ അടുത്തിടെയുണ്ടായ വര്‍ധനവില്‍ സഊദി ഊര്‍ജമന്ത്രി ഖാലിദ് ആല്‍ ഫാലിഹിനെ കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്‍ ആശങ്ക അറിയിച്ചു. ഡല്‍ഹിയില്‍ നടന്ന കൂടിക്കാഴ്ചയിലാണ് ഇന്ത്യയുടെ ആശങ്ക അദ്ദേഹത്തെ അറിയിച്ചത്.

പാചക വാതകവും അസംസ്‌കൃത എണ്ണയും ഇടതടവില്ലാതെ ഇന്ത്യക്ക് ലഭിക്കേണ്ട ആവശ്യകത സംബന്ധിച്ചും ധര്‍മേന്ദ്ര പ്രധാന്‍ സഊദി മന്ത്രിയുമായുള്ള ചര്‍ച്ചയില്‍ വ്യക്തമാക്കി. ഒപെക് തീരുമാനപ്രകാരം പ്രധാന എണ്ണ ഉല്‍പാദക രാജ്യങ്ങള്‍ ഇന്ത്യക്ക് ഇന്ധനം നല്‍കുന്നതിലുണ്ടായ ചില തടസങ്ങളുടെ സാഹചര്യത്തിലായിരുന്നു ഇത്. കഴിഞ്ഞമാസം സഊദി കിരീടാവകാശി മുഹമ്മദ് ബിന്‍ സല്‍മാന്‍ ഇന്ത്യാ സന്ദര്‍ശനം നടത്തിയിരുന്നു. അതിന് പിന്നാലെയാണ് ഊര്‍ജമന്ത്രിയും ഇന്ത്യയിലെത്തിയത്.

ആഗോള മാര്‍ക്കറ്റില്‍ അടുത്തിടെയുണ്ടായ രാഷ്ട്രീയ സംഭവ വികാസങ്ങള്‍ ഇരു മന്ത്രിമാരും ചര്‍ച്ച ചെയ്തു. ഇന്ത്യയിലെ ഇന്ധന മേഖലയിലെ സഊദി നിക്ഷേപം സംബന്ധിച്ചും വിശദമായ ചര്‍ച്ച നടത്തിയതായും കേന്ദ്ര പെട്രോളിയം മന്ത്രാലയം അറിയിച്ചു.

ഇരു രാജ്യങ്ങളുടെയും സംയുക്ത സംരംഭമായ വെസ്റ്റ് കോസ്റ്റ് എണ്ണശുദ്ധീകരണ ശാലയുടെ പ്രവര്‍ത്തനം, ലോകത്തിലെ ഏറ്റവും വലിയ ഗ്രീന്‍ഫീല്‍ഡ് ശുദ്ധീകരണ ശാലയായ മഹാരാഷ്ട്രയിലെ പെട്രോ കെമിക്കല്‍ പ്രോജക്ട് എന്നിവ സംബന്ധിച്ചും വിശദമായ ചര്‍ച്ച നടത്തി.