മേപ്പാടി: ചെമ്പ്രയിലുള്ള ഫാത്തിമ ഫാംസ് തേയിലത്തോട്ടം തൊഴിലാളികള്‍ പിടിച്ചെടുത്തു. എസ്റ്റേറ്റ് അളന്ന്തിരിച്ച് ഏറ്റെടുക്കല്‍ പ്രവൃത്തികളാണ് ഇന്നലെ ആരംഭിച്ചത്. രാവിലെ പ്രകടനമായെത്തിയാണ് തൊഴിലാളികള്‍ അളന്ന്തിരിക്കാന്‍ തുടങ്ങിയത്.
ഇന്നും തുടരുന്ന അളവ് അവസാനിക്കുന്ന മുറക്ക് തൊഴിലാളികള്‍ക്ക് ഓരോ പ്ലോട്ടുകള്‍ കൈമാറാനാണ് സമരസമിതിയുടെയും സമരസഹായസമിതിയുടെയും തീരുമാനം. നിരവധി തവണ ചര്‍ച്ചകള്‍ നടത്തിയിട്ടും സര്‍ക്കാര്‍ തുറക്കാന്‍ നിര്‍ദേശിച്ചിട്ടും അനുകൂല തീരുമാനമുണ്ടാകാത്ത സാഹചര്യത്തിലാണ് എസ്റ്റേറ്റ് തൊഴിലാളികള്‍ നിലനില്‍പ്പിനായി ഏറ്റെടുക്കുന്നത്. 20സെന്റ് വീതമുള്ള 20പ്ലോട്ടുകള്‍ അളന്ന് തിരിച്ചു.
ഇങ്ങനെ 312 പ്ലോട്ടുകളാണ് അളന്ന്തിരിക്കുക. രണ്ടാം നമ്പര്‍ ഡിവിഷനില്‍ നിന്നുമാണ് ഭൂമി അളന്ന് തിരിക്കല്‍ തുടങ്ങിയത്.
സമരസമിതി ചുമതലപ്പെടുത്തിയ 20 തൊഴിലാളികളാണ് ഭൂമി അളക്കുന്നത്. 2016 ഒക്‌ടോബര്‍ 27ന് ഏകപക്ഷീയമായി ലോക്കൗട്ട് ചെയ്ത തോട്ടം തുറക്കാന്‍ മാനേജ്‌മെന്റ് തയാറാകാത്ത സാഹചര്യത്തില്‍ ശക്തമായ സമരമുറ എന്ന നിലയിലാണ് എസ്റ്റേറ്റ് പ്ലോട്ടുകളായി അളന്നുതിരിച്ച് തൊഴിലാളികള്‍ക്ക് നല്‍കാനുള്ള തീരുമാനമെന്ന് സംയുക്ത ട്രേഡ് യൂണിയന്‍ നേതാക്കള്‍ പറഞ്ഞു.
പ്രക്ഷോഭത്തിന്റെ ഭാഗമായി 17, 18, 19 തിയതികളില്‍ കോട്ടപ്പടി വില്ലേജ് ഓഫിസ് ഉപരോധിക്കുമെന്നും അവര്‍ അറിയിച്ചു. 320 തൊഴിലാളികളാണ് ഫാത്തിമ ഫാംസിലുള്ളത്. തോട്ടം ലോക്കൗട്ട് ചെയ്തതിനു പിന്നാലെ ഇവര്‍ ആരംഭിച്ച സമരവും തടുരുകയാണ്.
സമരം ഒത്തുതീര്‍ക്കുന്നതിനും തോട്ടം തുറന്ന് പ്രവര്‍ത്തിപ്പിക്കുന്നതിനും ട്രേഡ് യൂണിയന്‍ നേതൃത്വവും തൊഴില്‍ വകുപ്പും മാനേജ്‌മെന്റുമായി ഇതിനകം ജില്ലാതലത്തിലും സംസ്ഥാനതലത്തിലും നടത്തിയ ചര്‍ച്ചകള്‍ വിജയിച്ചില്ല. തോട്ടം കനത്ത നഷ്ടത്തിലായതിനാല്‍ തൊഴിലാളികളില്‍ കുറെ പേരെ ഒഴിവാക്കണമെന്ന നിലപാടിലാണ് മാനേജ്‌മെന്റ്. സംയുക്ത ട്രേഡ് യൂണിയന്‍ സമരസമിതിയാകട്ടെ ഒരു തൊഴിലാളിയെ പോലും പിരിച്ചയക്കാന്‍ അനുവദിക്കില്ലെന്ന ശാഠ്യത്തിലുമാണ്.
ലോക്കൗട്ട് വിഷയത്തില്‍ ഏറ്റവും ഒടുവില്‍ തൊഴില്‍ മന്ത്രി ടി.പി രാമകൃഷ്ണന്റെ സാന്നിധ്യത്തില്‍ രണ്ടുതവണ ചര്‍ച്ച നടത്തിയിരുന്നു.
രണ്ടാമത്തെ ചര്‍ച്ചയില്‍ തോട്ടം തുറക്കാമെന്ന് മാനേജ്‌മെന്റ് പ്രതിനിധികള്‍ സമ്മതിച്ചതാണ്. എന്നാല്‍ പിന്നീട് നിലപാട് മാറ്റി.
ഇതില്‍ പ്രതിഷേധിച്ച് തൊഴിലാളികള്‍ അടുത്തിടെ ഫാത്തിമ ഫാംസിന്റെ കോഴിക്കോടുള്ള സഹസ്ഥാപനത്തിലേക്ക് മാര്‍ച്ച് നടത്തിയിരുന്നു. എന്നാല്‍ നടപടികള്‍ ഒന്നുമുണ്ടാകാത്ത സാഹചര്യത്തിലാണ് തൊഴിലാളികള്‍ ഭൂമി പിടിച്ചെടുക്കല്‍ സമരത്തിലേക്ക് നീങ്ങിയത്.

പ്രകടനവും പൊതുയോഗവും

മേപ്പാടി: ചെമ്പ്ര എസ്റ്റേറ്റ് തുറന്ന് പ്രവര്‍ത്തിപ്പിക്കാത്ത മാനേജ്‌മെന്റ് നടപടിയില്‍ പ്രതിഷേധിച്ച് മേപ്പാടിയില്‍ തൊഴിലാളികളുടെ പ്രകടനവും പൊതുയോഗവും നടന്നു. നൂറ് കണക്കിന് തൊഴിലാളികള്‍ പ്രകടനത്തില്‍ അണിനിരന്നു. തുടര്‍ന്ന് നടന്ന പൊതുയോഗം സി.കെ ശശീന്ദ്രന്‍ എം.എല്‍.എ ഉദ്ഘാടനം ചെയ്തു.
പഞ്ചായത്ത് പ്രസിഡന്റ് കെ.കെ സഹദ് അധ്യക്ഷനായി. പി.പി.എ കരീം, കെ വി മോഹനന്‍, ടി.ഹംസ, സമരസഹായസമിതി ചെയര്‍മാന്‍ പി ഗഗാറിന്‍, കണ്‍വീനര്‍ പി.കെ അനില്‍കുമാര്‍, എന്‍ വേണുഗോപാല്‍, പി.ആര്‍ സുരേഷ്, ടി.ആര്‍ ശ്രീധരന്‍, എന്‍.ഒ ദേവസ്യ സംസാരിച്ചു. ടി.എ മുഹമ്മദ് സ്വാഗതവും കെ വിനോദ് നന്ദിയും പറഞ്ഞു.