മുക്കം: വീടിന് അപകട ഭീഷണിയുയര്‍ത്തി മണ്ണിടിച്ചില്‍.
കൊടിയത്തൂര്‍ പന്നിക്കോട് കൊളക്കാടന്‍ സാദിഖിന്റെ വീടിന് മുകളിലെ മതിലാണ് ഇന്നലെ രാവിലെ ഒന്‍പതോടെ വന്‍ ശബ്ദത്തില്‍ ഇടിഞ്ഞ് താഴേക്ക് പതിച്ചത്. മണ്ണിടിഞ്ഞതിനെ തുടര്‍ന്ന് വീടിന് മുകളില്‍ അപകട ഭീഷണി ഉയര്‍ത്തിയ രണ്ട് കൂറ്റന്‍ പാറകള്‍ മുക്കം ഫയര്‍ഫോഴ്‌സും ദുരന്തനിവാരണ അതോറിറ്റിയും ചേര്‍ന്ന് മാറ്റി. പാറ പൊട്ടിച്ചുമാറ്റിയാണ് അപകടം താല്‍ക്കാലികമായി ഒഴിവാക്കിയത്.
എങ്കിലും ഇപ്പോഴും അപകട ഭീഷണി നിലനില്‍ക്കുന്നുണ്ട്. കൊടിയത്തൂര്‍ പഞ്ചായത്ത് പ്രസിഡന്റ് സി.ടി.സി അബ്ദുല്ല, സ്റ്റാന്റിങ് കമ്മിറ്റി ചെയര്‍മാന്‍ കെ.പി ചന്ദ്രന്‍, വാര്‍ഡ് മെംബര്‍ ഷിജി പരപ്പില്‍ തുടങ്ങിയവര്‍ സ്ഥലം സന്ദര്‍ശിച്ചു.