വാഷിങ്ടണ്‍: കൊവിഡ് വ്യാപനം വിവിധ രാജ്യങ്ങളില്‍ നിയന്ത്രണാതീതമാകുന്നു. അമേരിക്കയിലും റഷ്യയിലും രോഗികളുടെ എണ്ണം ദിവസേന വലിയതോതില്‍ വര്‍ധിക്കുന്നതിനു പുറമേ, ബ്രസീലിലും രോഗവ്യാപനം അനിയന്ത്രിതമാകുകയാണ്. ഇന്നലെ രണ്ടായിരത്തിലേറെ പേര്‍ക്കു രോഗം സ്ഥിരീകരിച്ചതോടെ ബ്രസീലില്‍ രോഗബാധിതരുടെ എണ്ണം 2.2 ലക്ഷം പിന്നിട്ടു.
രാജ്യത്ത് പ്രസിഡന്റ് ജയര്‍ ബോല്‍സനാരോയുടെ നിലപാടുകളില്‍ പ്രതിഷേധിച്ച് ആരോഗ്യമന്ത്രി കഴിഞ്ഞ ദിവസം രാജി പ്രഖ്യാപിച്ചിരുന്നു. ഒരു മാസത്തിനിടെ രണ്ടാമത്തെ ആരോഗ്യമന്ത്രിയാണ് സ്ഥാനമൊഴിഞ്ഞത്. കൊവിഡ് പടരുമ്പോഴും രാജ്യത്തെ നിയന്ത്രണങ്ങള്‍ ഒഴിവാക്കണമെന്ന നിലപാടിലാണ് പ്രസിഡന്റുള്ളത്. ഇതിനെ എതിര്‍ത്തതിനായിരുന്നു കഴിഞ്ഞ മാസം അദ്ദേഹം ആരോഗ്യമന്ത്രിയെ പുറത്താക്കിയത്. പിന്നീട് പ്രസിഡന്റുതന്നെ നിയമിച്ച ആരോഗ്യമന്ത്രിയാണ് കഴിഞ്ഞ ദിവസം രാജിവച്ചൊഴിഞ്ഞത്. പുതിയ ആരോഗ്യമന്ത്രിയെ പ്രസിഡന്റ് പ്രഖ്യാപിച്ചിട്ടുമുണ്ട്. അതേസമയം, രാജ്യത്ത് കൊവിഡ് ബാധിച്ചുള്ള മരണസംഖ്യ 14,962 ആയി ഉയര്‍ന്നിട്ടുണ്ട്.
മെക്‌സിക്കോയിലും കൊവിഡ് മരണങ്ങള്‍ കൂടുകയാണ്. ഇന്നലെ മാത്രം 290 പേര്‍ മരിച്ചതോടെ ഇവിടെ മരണസംഖ്യ 4,767 ആയി ഉയര്‍ന്നു. അര ലക്ഷത്തോളം പേര്‍ക്കാണ് രോഗം സ്ഥിരീകരിച്ചിരിക്കുന്നത്.
ലോകത്ത് രോഗം ബാധിച്ച് മരിച്ചവരുടെ എണ്ണം 3,08,984 ആയി ഉയര്‍ന്നു. 46.46 ലക്ഷം പേര്‍ക്കാണ് കൊവിഡ് സ്ഥിരീകരിച്ചിരിക്കുന്നത്. ഇതില്‍ 17.71 ലക്ഷം പേര്‍ രോഗവിമുക്തരായിട്ടുണ്ട്. ലോകാരോഗ്യ സംഘടന നല്‍കുന്ന ഔദ്യോഗിക കണക്കനുസരിച്ച് ലോകത്ത് കൊവിഡ് ബാധിച്ച് 3,00,441 പേര്‍ മരിക്കുകയും 43,96,392 പേര്‍ക്കു രോഗം സ്ഥിരീകരിക്കുകയും ചെയ്തിട്ടുണ്ട്.
അമേരിക്കയിലെ മരണസംഖ്യ 88,603 ആയി ഉയര്‍ന്നപ്പോള്‍ ഇവിടെ 14.84 ലക്ഷം പേര്‍ക്കാണ് രോഗം സ്ഥിരീകരിച്ചിരിക്കുന്നത്. സ്‌പെയിനില്‍ 2.74 ലക്ഷം, റഷ്യയില്‍ 2.72 ലക്ഷം, ബ്രിട്ടനില്‍ 2.37 ലക്ഷം, ഇറ്റലിയില്‍ 2.24 ലക്ഷം എന്നിങ്ങനെയാണ് രോഗികളുടെ എണ്ണം. ഫ്രാന്‍സ്, ജര്‍മനി, തുര്‍ക്കി, ഇറാന്‍ എന്നിവിടങ്ങളില്‍ മരണസംഖ്യ ഒരു ലക്ഷം പിന്നിട്ടിട്ടുണ്ട്. സ്‌പെയിനില്‍ 27,563, റഷ്യയില്‍ 2,537, ബ്രിട്ടനില്‍ 34,466, ഇറ്റലിയില്‍ 31,610, ഫ്രാന്‍സില്‍ 27,529, ജര്‍മനിയില്‍ 8,001, തുര്‍ക്കിയില്‍ 4,055, ഇറാനില്‍ 6,937, പെറുവില്‍ 2,392, ചൈനയില്‍ 4,633, കാനഡയില്‍ 5,562, ബെല്‍ജിയത്തില്‍ 9,005, മെക്‌സിക്കോയില്‍ 4,767, നെതര്‍ലാന്‍ഡ്‌സില്‍ 5,643, ഇക്വഡോറില്‍ 2,594, സ്വീഡനില്‍ 3,646, സ്വിറ്റ്‌സര്‍ലാന്‍ഡില്‍ 1,878, പോര്‍ച്ചുഗലില്‍ 1,190, അയര്‍ലന്‍ഡില്‍ 1,518, റൊമാനിയയില്‍ 1,081, ഇന്തോനേഷ്യയില്‍ 1,089 എന്നിങ്ങനെയാണ് മരണസംഖ്യ. ഇന്ത്യയ്ക്കു പുറമേ ഈ രാജ്യങ്ങളിലാണ് മരണസംഖ്യ ആയിരം പിന്നിട്ടിരിക്കുന്നത്.