കൊടുങ്ങല്ലൂര്‍: ബൈക്കില്‍ സഞ്ചരിച്ച് കഞ്ചാവ് വില്‍പന നടത്തിയ യുവാവ് എക്‌സൈസ് പിടിയിലായി. ഇയാളുടെ ബൈക്കും കസ്റ്റഡിയിലെടുത്തു. ശ്രീനാരായണപുരം സ്വദേശി അനീഷ് (19) നെയാണ് ശ്രീനാരായണപുരം അസ്മാബി കോളേജിന് സമീപം വെച്ച് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.കെ. അഷറഫും സംഘവും ചേര്‍ന്ന് അറസ്റ്റ് ചെയ്തത്. കഞ്ചാവ് വില്‍പന നടത്തുന്നതിനിടയില്‍ എക്‌സൈസ് ജീപ്പ് കണ്ട് ബൈക്കില്‍ അമിത വേഗതയില്‍ പാഞ്ഞ ഇയാളെ പിന്‍തുടര്‍ന്ന് പിടികൂടുകയായിരുന്നു. തീരദേശം കേന്ദ്രീകരിച്ച് പ്രവര്‍ത്തിക്കുന്ന കഞ്ചാവ് വില്‍പനക്കാരില്‍ നിന്നും കഞ്ചാവ് ചില്ലറയായി വാങ്ങി പൊതികളാക്കി ആവശ്യക്കാര്‍ക്ക് നല്‍കി വരികയായിരുന്നു ഇയാള്‍.
മുന്‍പ് അറസ്റ്റിലായിരുന്നവരില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ ഒരാഴ്ചയായി ഇയാള്‍ എക്‌സൈസിന്റെ നിരീക്ഷണത്തിലായിരുന്നു. പ്രിവന്റീവ് ഓഫിസര്‍ എം.ആര്‍ നെല്‍സണ്‍, ടി.ആര്‍ സുനില്‍, ടി.കെ അബ്ദുള്‍നിയാസ്, പി.ആര്‍ സുനില്‍കുമാര്‍, ടി.എസ് സുനില്‍കുമാര്‍ എന്നിവരടങ്ങിയ സംഘമാണ് ഇയാളെ പിടികൂടിയത്.