അഞ്ചല്‍: തൊഴുത്തില്‍ കെട്ടിയിരുന്ന പോത്തിനെ രാത്രിയില്‍ മോഷ്ടിച്ച് കടത്താന്‍ ശ്രമിക്കുന്നതിനിടെ രണ്ട് പേര്‍ പൊലിസിന്റെ പിടിയിലായി. സംഘത്തിലുണ്ടായിരുന്ന ഒരാള്‍ ഓടി രക്ഷപ്പെട്ടു. കഴിഞ്ഞ ദിവസം രാത്രി ഒരുമണിയോടെയാണ് സംഭവം. ഏരൂര്‍ പത്തടി അടപ്പുപാറ പള്ളിക്ക് സമീപം അനസിന്റെ പോത്തിനെയാണ് കടത്തിക്കൊണ്ടു പോകാനുള്ള ശ്രമം നടന്നത്. പോത്തിന്റെ ബഹളം കേട്ട് ഉണര്‍ന്ന അനസും കുടുംബാംഗങ്ങളും ബഹളം വച്ചതോടെ ഉണര്‍ന്ന് ഓടിയെത്തിയ പരിസരവാസികളും ചേര്‍ന്ന് മോഷ്ടാക്കളെ പിടികൂടുകയായിരുന്നു.
ഇടമുളയ്ക്കല്‍ നെടുങ്ങോട്ടുകോണത്ത് ബീനാഭവനില്‍ വര്‍ഗീസ് (40), ഇടമുളയ്ക്കല്‍ പടിഞ്ഞാറ്റിന്‍കര സുനീഷ് ഭവനില്‍ സുമേഷ് (27) എന്നിവരാണ് പിടിയിലായത്. ഇവര്‍ വന്ന പിക്കപ് വാനും നാട്ടുകാര്‍ തടഞ്ഞിട്ടു. വിവരം അറിഞ്ഞ് സ്ഥലത്തെത്തിയ ഏരൂര്‍ പൊലിസ് പിക്കപ് വാന്‍ ഉള്‍പ്പെടെ ഇരുവരേയും കസ്റ്റഡിയിലെടുത്തു. പുനലൂര്‍ കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.