കണ്ണൂര്‍: കേരളത്തിലെത്തുന്ന കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി കൊല്ലപ്പെട്ട യൂത്ത് കോണ്‍ഗ്രസ് നേതാവ് മട്ടന്നൂര്‍ എടയന്നൂരിലെ ശുഹൈബിന്റെ കുടുംബത്തെ സന്ദര്‍ശിക്കും.

നാളെ ഉച്ചക്ക് 1.30ന് രാഹുല്‍ പ്രത്യേക വിമാനത്തിലാണ് കണ്ണൂരിലെത്തുക. രാവിലെ തൃശ്ശൂരില്‍ ഫിഷര്‍മെന്‍ പാര്‍ലമെന്റ് സമ്മേളനത്തില്‍ പങ്കെടുത്തതിന് ശേഷമാണ് കണ്ണൂരിലെത്തുന്നത്.

വിമാനത്താവളത്തിലെ വി.ഐ.പി ലോഞ്ചില്‍ വച്ചാണ് ശുഹൈബിന്റെ കുടുംബാംഗങ്ങളെയും ശുഹൈബിനൊപ്പം അക്രമത്തിനിരയായ യൂത്ത് കോണ്‍ഗ്രസ് പ്രവര്‍ത്തകരെയും കാണുക. 30 മിനിറ്റാണ് ശുഹൈബിന്റെ കുടുംബാംഗങ്ങളോടൊപ്പം രാഹുല്‍ ചെലവഴിക്കുക.

തുടര്‍ന്ന് കാസര്‍കോട് പെരിയയില്‍ കൊല്ലപ്പെട്ട യൂത്ത് കോണ്‍ഗ്രസ് പ്രവര്‍ത്തകരായ ശരത്‌ലാല്‍, കൃപേഷ് എന്നിവരുടെ വീടുകള്‍ സന്ദര്‍ശിക്കും. തുടര്‍ന്ന് വൈകീട്ട് കോഴിക്കോട്ട് നടക്കുന്ന ജനമഹാറാലിയിലും പങ്കെടുക്കും.