തൊടുപുഴ: പാലിയേറ്റീവ് കെയര്‍ രോഗികള്‍ക്കു സാന്ത്വനം പകരാന്‍ ജില്ലാ ആരോഗ്യ വകുപ്പ് പാലീയേറ്റീവ് കെയര്‍ യൂത്ത് മൂവ്‌മെന്റിന്റെ നേതൃത്വത്തില്‍ ന്യൂമാന്‍ കോളജില്‍ സംഘടിപ്പിച്ച കലാ കായികമേള സമാപിച്ചു.
ജില്ലയിലെ ആരോഗ്യ സ്ഥാപനങ്ങളുടെയും പഞ്ചായത്തുകളുടെയും നഗരസഭകളുടെയും നേതൃത്വത്തില്‍ നടത്തി വരുന്ന പാലീയേറ്റീവ് കെയര്‍ പദ്ധതിയില്‍ ഉള്‍പ്പെട്ടിട്ടുള്ള നട്ടെല്ലിന് ക്ഷതം സംഭവിച്ച് അരയ്ക്ക് കീഴ്‌പോട്ട് ചലനശേഷി നഷ്ടപ്പെട്ടവര്‍, പോളിയോ ബാധിതര്‍, അംഗവൈകല്യം സംഭവിച്ചവര്‍, കാന്‍സര്‍ പോലുള്ള രോഗബാധിതര്‍, പ്രായമായവര്‍ ഉള്‍പ്പെടെ ഇരുന്നൂറോളം പേര്‍ കലാകായിക മേളയില്‍ പങ്കെടുത്തു.
സമാപന ദിവസമായ ഇന്നലെ നാല് വേദികളിലായാണ് മത്സരങ്ങള്‍ നടന്നത്. വീല്‍ചെയര്‍ രോഗികള്‍ക്കുള്ള പഞ്ചഗുസ്തി, ചെസ്സ്, കാരംസ്, ബോള്‍ പാസിംഗ്, വീല്‍ചെയര്‍ റിലേ, കഥാരചന, ചിത്രരചന, കാന്‍സര്‍ രോഗികള്‍ക്കുള്ള പദ്യപാരായണം, ലളിത ഗാനം, മാപ്പിളപ്പാട്ട്, കവിത, പ്രസംഗം എന്നി മത്സരങ്ങള്‍ നടന്നു.
ഉച്ചകഴിഞ്ഞ് നടന്ന സമാപന സമ്മേളനം റോഷി അഗസ്റ്റിന്‍ എം.എല്‍.എ ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്റ് മാത്യു ജോണ്‍ അധ്യക്ഷത വഹിച്ചു. യൂത്ത് മൂവ്‌മെന്റ് മെമ്പര്‍ ലിഫിന്‍ ഈപ്പച്ചന്‍ റിപ്പോര്‍ട്ട് അവതരിപ്പിച്ചു. പാലിയേറ്റീവ് ജില്ലാ കോഓര്‍ഡിനേറ്റര്‍ സിജോ വിജയന്‍ ജില്ലയിലെ പാലിയേറ്റീവ് പ്രവര്‍ത്തനങ്ങള്‍ വിശദീകരിച്ചു.
കരിങ്കുന്നം പഞ്ചായത്ത് പ്രസിഡന്റ് ബീന ബിജു, ഇടവെട്ടി പഞ്ചായത്ത് പ്രസിഡന്റ് ലത്തീഫ് മുഹമ്മദ്, തൊടുപുഴ മുനിസിപ്പല്‍ വൈസ് ചെയര്‍മാന്‍ ടി കെ സുധാകരന്‍ നായര്‍, ന്യൂമാന്‍ കോളജ് പ്രിന്‍സിപ്പല്‍ ഫാ. വിന്‍സെന്റ് നെടുങ്ങാട്ട്, ബര്‍സാര്‍ ഫാ. തോമസ് പൂവത്തിങ്കല്‍, സിസ്റ്റര്‍ അല്‍ഫോന്‍സ, ഡോ. മിനി, ഡോ. പ്രിന്‍സ് മറ്റം, മാസ് മീഡിയ ഓഫീസര്‍ ജയരാജ്, ഉഷാകുമാരി പി.കെ എന്നിവര്‍ പ്രസംഗിച്ചു. ജില്ലാ പാലിയേറ്റീവ് നോഡല്‍ ഓഫീസര്‍ ഡോ. സുരേഷ് വര്‍ഗീസ് സ്വാഗതവും പാലിയേറ്റീവ് യൂത്ത് മൂവ്‌മെന്റ് പ്രവര്‍ത്തകന്‍ മിഥുന്‍ മനോഹര്‍ നന്ദിയും പറഞ്ഞു.
കലാതിലകം, കലാപ്രതിഭ ഫല പ്രഖ്യാപനം നഗരസഭ ആരോഗ്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ റിനി ജോഷി നിര്‍വ്വഹിച്ചു. കലാതിലകമായി കാമാക്ഷി സ്വദേശി ഷീബയും, കലാപ്രതിഭയായി മണക്കാട് സ്വദേശി റ്റോമി മാത്യുവും തെരഞ്ഞെടുക്കപ്പെട്ടു. മത്സര വിജയികള്‍ക്ക് ഒന്നാം സമ്മാനം 1500 രൂപയും, രണ്ടാം സമ്മാനം 501 രൂപയും, മൂന്നാം സമ്മാനം 251 രൂപയും നല്‍കി. പ്രോത്സാഹന സമ്മാനങ്ങളും സര്‍ട്ടിഫിക്കറ്റ്, ട്രോഫികള്‍ എന്നിവയും വിതരണം ചെയ്തു. പാലിയേറ്റീവ് രോഗികള്‍, യൂത്ത് മൂവ്‌മെന്റ് പ്രവര്‍ത്തകര്‍ എന്നിവര്‍ വിവിധ കലാപരിപാടികള്‍ അവതരിപ്പിച്ചു.
എം.എല്‍.എമാര്‍, ത്രിതല പഞ്ചായത്ത് പ്രസിഡന്റുമാര്‍, ആരോഗ്യ പ്രവര്‍ത്തകര്‍, ന്യൂമാന്‍ കോളജ് അധികൃതര്‍, അധ്യാപകര്‍, പാലിയേറ്റീവ് നഴ്‌സുമാര്‍, ആശാ പ്രവര്‍ത്തകര്‍, സാമൂഹിക പ്രവര്‍ത്തകര്‍ തുടങ്ങിയവര്‍ രണ്ട് ദിവസങ്ങളിലായി നടന്ന ഫിനിക്‌സ് -2016 ല്‍ പങ്കെടുത്തു.