തിരുവനന്തപുരം: കെ.എം മാണിയും പി.ജെ ജോസഫും സീറ്റ് തര്‍ക്കം തുടരുന്നത് യു.ഡി.എഫിന് തലവേദനയായി. പ്രശ്‌നങ്ങള്‍ പരിഹരിക്കാന്‍ കോണ്‍ഗ്രസ് ശ്രമം തുടങ്ങി. വിഷയം തല്‍ക്കാലത്തേക്കെങ്കിലും പരിഹരിക്കുന്നതിനുള്ള ഫോര്‍മുലയ്ക്കാണ് ശ്രമം.
ഇന്നലെ രാവിലെ ജോസഫുമായി രമേശ് ചെന്നിത്തല കന്റോണ്‍മെന്റ് ഹൗസില്‍ ചര്‍ച്ച നടത്തി. തുടര്‍ന്ന് ഉമ്മന്‍ചാണ്ടിയെ അദ്ദേഹത്തിന്റെ വസതിയിലെത്തി ജോസഫ് കണ്ടു. ഇതിനുശേഷം ഉമ്മന്‍ചാണ്ടി ചെന്നിത്തലയുമായി ചര്‍ച്ച നടത്തി. മുല്ലപ്പള്ളിയും ചര്‍ച്ചയില്‍ പങ്കെടുത്തു.

ചര്‍ച്ചയ്ക്കിടെ ടി.യു കുരുവിള, മോന്‍സ് ജോസഫ് എന്നിവര്‍ക്കൊപ്പം ജോസഫ് വീണ്ടുമെത്തി. ഇവര്‍ക്ക് പറയാനുള്ളത് രണ്ടു മണിക്കൂറിലധികം കോണ്‍ഗ്രസ് നേതാക്കള്‍ കേട്ടു. തര്‍ക്കം പരിഹരിക്കാന്‍ ജോസഫ് ഉപാധികള്‍ വച്ചു.
ലോക്‌സഭാ സീറ്റ് ലഭിച്ചില്ലെങ്കിലും തല്‍ക്കാലം പാര്‍ട്ടിയില്‍ തുടരാം. എപ്പോള്‍ പാര്‍ട്ടി വിടേണ്ട സാഹചര്യം വന്നാലും യു.ഡി.എഫില്‍ നില്‍ക്കാന്‍ ഇടംകിട്ടണം. കോട്ടയത്ത് സ്ഥാനാര്‍ഥി തോറ്റാല്‍ തനിക്കൊപ്പമുള്ളവരെ കുറ്റപ്പെടുത്തരുത്. മാണിയും മകനുമായും കോണ്‍ഗ്രസ് ചര്‍ച്ചനടത്തണമെന്നും ആവശ്യപ്പെട്ട ജോസഫ്, എല്‍.ഡി.എഫിലേക്ക് പോകാന്‍ അനുവദിക്കാത്തതിന്റെ പകരംവീട്ടുകയാണ് മാണിയെന്നും ആരോപിച്ചു.

മാണിയുമായും ജോസ് കെ.മാണിയുമായും ചര്‍ച്ച നടത്തുമെന്ന് ചെന്നിത്തല പ്രതികരിച്ചു. ഏതായാലും ലോക്‌സഭാ തെരഞ്ഞെടുപ്പില്‍ ജോസഫ് വിഭാഗത്തിന് സീറ്റ് ലഭിക്കില്ലെന്നും ജോസഫ് മത്സരിക്കില്ലെന്നും ഏറക്കുറേ ഉറപ്പായിട്ടുണ്ട്.