കോഴിക്കോട്: വടകരയില്‍ പി. ജയരാജനെതിരേ കെ.കെ രമ യു.ഡി.എഫ് സ്ഥാനാര്‍ഥിയാകണമെന്ന് കെ.എം ഷാജി എം.എല്‍.എ. രമ സ്ഥാനാര്‍ഥിയാകട്ടെയെന്ന് ആഗ്രഹിക്കുന്നുവെന്നും ഷാജി ഫേസ്ബുക്ക് പോസ്റ്റില്‍ പറഞ്ഞു.

വേട്ടക്കാരനെതിരായി ഇരയുടെ ഇച്ഛാശക്തിയേക്കാള്‍ മികച്ച പ്രതിരോധമില്ല. ജനാധിപത്യത്തില്‍ ഇങ്ങനെയാകണം തന്ത്രം. 51 വെട്ട് വെട്ടാന്‍ ഉപയോഗിച്ച വാള്‍ത്തലയെക്കാള്‍ ശക്തമാണ് ജനാധിപത്യത്തില്‍ വോട്ടിങ് എന്നത്. ജനാധിപത്യത്തില്‍ വിശ്വാസമില്ലാത്ത വേട്ടക്കാര്‍ക്ക് മനസിലാക്കിക്കൊടുക്കാന്‍ ഇതാണ് നല്ലത്. രാഷ്ട്രീയ കൊലപാതകങ്ങള്‍ ഈ തെരഞ്ഞെടുപ്പില്‍ പ്രതിഫലിക്കും. ഏറ്റവും വലിയ ജീവിക്കുന്ന ഇര കെ.കെ രമയാണ്.

ഇരയും വേട്ടക്കാരനും തമ്മിലുള്ള ജനാധിപത്യ പോര്‍ക്കളത്തിന് അരങ്ങൊരുങ്ങട്ടെയെന്ന് ആഗ്രഹിക്കുന്നുവെന്നും എന്നാല്‍ തീരുമാനം കോണ്‍ഗ്രസിന്റേതാണെന്നും ഷാജി ഫേസ്ബുക്ക് പോസ്റ്റില്‍ പറഞ്ഞു.