കോഴിക്കോട്: ഇടുക്കി സീറ്റ് നല്‍കി കേരളാ കോണ്‍ഗ്രസിലെ പ്രശ്‌നപരിഹാരത്തിന് ശ്രമിച്ചാല്‍, മുസ്‌ലിം ലീഗ് മൂന്നാം സീറ്റ് വാങ്ങണമെന്ന ആവശ്യം ശക്തമായി. ഇടുക്കി സീറ്റ് പി.ജെ ജോസഫിന് നല്‍കുകയാണെങ്കില്‍ വടകര വാങ്ങണമെന്ന് യൂത്ത് ലീഗ് നേതൃത്വം പാണക്കാട് ഹൈദരലി ശിഹാബ് തങ്ങളെ കണ്ട് അറിയിച്ചു.

വടകര സീറ്റ് വാങ്ങണമെന്ന് നേരത്തേയും യൂത്ത് ലീഗ് ആവശ്യപ്പെട്ടിരുന്നു. ശക്തമായ ആവശ്യം ഉയര്‍ന്നിരുന്നുവെങ്കിലും, ഈ സാഹചര്യത്തില്‍ കോണ്‍ഗ്രസിന് കൂടുതല്‍ വിജയം ആവശ്യമാണെന്ന പരിഗണന വച്ച് ലീഗ് പിന്‍വലിയുകയായിരുന്നു. എന്നാല്‍ കേരളാ കോണ്‍ഗ്രസിലെ പ്രശ്‌നം പരിഹരിക്കാന്‍ ഇടുക്കി സീറ്റ് വിട്ടുനല്‍കുകയാണെങ്കില്‍ മൂന്നാം സീറ്റ് ലീഗിന് കിട്ടിയേ തീരൂയെന്ന നിലപാടിലാണ് അണികള്‍.