പാലക്കാട് : കോണ്‍ഗ്രസ് പാര്‍ട്ടിയില്‍ പ്രാഥമിക അംഗത്വം പോലുമില്ലാത്ത രണ്ട് സാമൂഹ്യ വിരുദ്ധരാണ് കഴിഞ്ഞ ദിവസം കോണ്‍ഗ്രസിനെതിരെ പത്രസമ്മേളനം നടത്തിയ സിദ്ദിഖ് ഇരുപ്പശേരിയും ദാസന്‍ വെണ്ണക്കരയുമെന്ന് ഡി.സി.സി. പ്രസിഡന്റ് വി. കെ. ശ്രീകണ്ഠന്‍ പറഞ്ഞു.
ഒന്നര വര്‍ഷം മുന്‍പ് സംഘടനാ വിരുദ്ധ പ്രവര്‍ത്തനം നടത്തിയതിന്റെ പേരില്‍ സിദ്ദിഖിനെ ഐ.എന്‍.ടി.യു.സി.യില്‍ നിന്ന് പുറത്താക്കിയിരുന്നു.
ഇത്തരക്കാരായ ചിലര്‍ സമരങ്ങളില്‍ നുഴഞ്ഞുകയറി പിന്നീട് ഒത്തുതീര്‍പ്പ് ഫോര്‍മുലയുമായി തട്ടിപ്പിനിറങ്ങുന്നവരാണെന്ന് പാര്‍ട്ടിക്ക് ബോധ്യപ്പെട്ടിട്ടുണ്ട്. കോണ്‍ഗ്രസിന്റെ പേരു പറഞ്ഞ് സാമ്പത്തിക തട്ടിപ്പ് നടത്തിയതിന്റെ പേരില്‍ പാര്‍ട്ടി ഓഫീസില്‍ പോലും കയറരുതെന്ന് മുമ്പുതന്നെ ഇവരോട് നിര്‍ദ്ദേശിച്ചിരുന്നു. പാര്‍ട്ടിയുടെ പേരില്‍ ഇത്തരം തട്ടിപ്പ് തുടര്‍ന്നാല്‍ പൊലിസില്‍ പരാതി നല്കുമെന്ന് ഇവരെ അറിയിച്ചിരുന്നു. ഇതില്‍ പ്രകോപിതരായാണ് പാര്‍ട്ടിയില്‍ സ്ഥാനവും അംഗത്വവുമില്ലാത്ത ഇവര്‍ ആരോപണം ഉന്നയിക്കുന്നത്. ഇവര്‍ക്കൊപ്പം ഒരാള്‍ പോലും പാര്‍ട്ടി വിട്ടിട്ടില്ലെന്ന് ശ്രീകണ്ഠന്‍ അറിയിച്ചു