പാലക്കാട്: ബിജെപി നേതാവ് വി മുരളീധരന്റെ പുത്തനച്ച പുരപ്പുറം തൂക്കുമെന്ന ആക്ഷപത്തിന് മറുപടിയുമായി കോണ്‍ഗ്രസ് നേതാവ് സന്ദീപ് വാര്യര്‍. വി മുരളീധരന് ബിജെപി അധ്യക്ഷന്‍ രാജീവ് ചന്ദ്രശേഖറിനോട് വല്ലതും പറയാനുണ്ടെങ്കില്‍ നേരിട്ട് ആകാമെന്നും തന്നെ കൂട്ടുപിടിക്കേണ്ടതില്ലെന്നും സന്ദീപ് വാര്യര്‍ പറഞ്ഞു. സംസ്ഥാന ബിജെപിയിലെ അസ്വാരാസ്യങ്ങളെ ചൂണ്ടിക്കാട്ടിയാണ് സന്ദീപ് വാര്യറുടെ പരാമര്‍ശം. 

'മുരളീധരനെയും, കെ സുരേന്ദ്രനെയും ബിജെപിയുടെ ജില്ല മീറ്റുങ്ങള്‍ക്ക് പോലും വിളിക്കുന്നില്ലെന്നാണ് അറിഞ്ഞത്. അതുകൊണ്ട് അവരുടെ പുതിയ അധ്യക്ഷന്‍ രാജീവ് ചന്ദ്രശേഖറിനെ കുറിച്ച് പുരപ്പുറം തൂക്കുമെന്നാണ് അഭിപ്രായമെങ്കില്‍ മുഖത്ത് നോക്കി പറയാനുള്ള ആര്‍ജവം കാണിക്കണം. അതിന് എന്നെ ഉപയോഗിക്കണ്ട. ഞാന്‍ കോണ്‍ഗ്രസില്‍ വന്നിട്ട് ഏഴെട്ട് മാസമായി. ഇവിടെ പുതിയ ആളല്ല. ഉറച്ച കോണ്‍ഗ്രസ് പ്രവര്‍ത്തകനാണ്. വി മുരളീധരന്റെ സര്‍ട്ടിഫിക്കറ്റ് തല്‍ക്കാലം ആവശ്യമില്ല,' സന്ദീപ് വാര്യര്‍ മറുപടി പറഞ്ഞു. 

ALSO READ: മലപ്പുറത്ത് പുതിയ നിപ കേസുകളില്ല: നിയന്ത്രണങ്ങൾ പിൻവലിച്ചു;  മങ്കട, കുറുവ പഞ്ചായത്തുകളിലെ കണ്ടൈൻമെന്റ് സോണുകളും നീക്കി 

ചാരക്കേസില്‍ അറസ്റ്റിലായ വ്‌ളോഗര്‍ ജ്യോതി മല്‍ഹോത്രയുടെ കേരള സന്ദര്‍ശനം വിവാദമായതിന് പിന്നാലെയാണ് പരസ്പരം കൊമ്പുകോര്‍ത്ത് മുരളീധരനും, സന്ദീപ് വാര്യരും രംഗത്തെത്തിയത്. ജ്യോതി മല്‍ഹോത്രയുടെ സന്ദര്‍ശനം കേരളത്തിനെതിരെ ആയുധമാക്കാനാണ് ബിജെപി തീരുമാനം. എന്നാല്‍ തൊട്ടുപിന്നാലെ ജ്യോതിയും ബിജെപി നേതാവ് കെ മുരളീധരനും ഒന്നിച്ച് വന്ദേഭാരതില്‍ യാത്ര ചെയ്യുന്ന വീഡിയോയും പുറത്തുവന്നു. ഇതോടെ ബിജെപി വെട്ടിലായി. 

ജ്യോതി മല്‍ഹോത്രയെ ഡല്‍ഹിയില്‍ നിന്ന് കാസര്‍ഗോഡ് എത്തിച്ചത് വി മുരളീധരനുമായി അടുത്ത ബന്ധമുള്ളയാളാണെന്നും, വന്ദേഭാരത് ഉദ്ഘാടന ദിവസത്തെ പാസുകള്‍ നല്‍കിയത് ബിജെപി ഓഫീസില്‍ നിന്നാണെന്നും സന്ദീപ് വാര്യര്‍ ആരോപിച്ചു. 

ഇതിന് മറുപടിയായി കോണ്‍ഗ്രസിനോട് കൂറ് കാണിക്കാനാണ് സന്ദീപിന്റെ ശ്രമമെന്നും, പുത്തനച്ചി പുരപ്പുറം തൂക്കുമെന്നും മുരളീധരന്‍ പരിഹസിച്ചു. ബാക്കിയുള്ളവരേക്കാള്‍ കൂടുതല്‍ അധ്വാനിക്കുന്നത് അതിന് വേണ്ടിയാണെന്നും അതിന് തനിക്ക് എതിര്‍പ്പില്ലെന്നും മുരളീധരന്‍ പറഞ്ഞിരുന്നു. 

ഇതിന് മറുപടിയായാണ് സന്ദീപ് വാര്യര്‍ ഇപ്പോള്‍ രംഗത്തെത്തിയിട്ടുള്ളത്. രാജീവ് ചന്ദ്രശേഖര്‍ പാര്‍ട്ടി അധ്യക്ഷനായി എത്തിയതിന് പിന്നാലെ ബിജെപിയില്‍ വിഭാഗീയത വര്‍ധിച്ചതായാണ് റിപ്പോര്‍ട്ട്. മുന്‍ അധ്യക്ഷന്‍മാരായ വി മുരളീധരനെയും, കെ സുരേന്ദ്രനെയും പാര്‍ട്ടി യോഗങ്ങളില്‍ നിന്ന് മാറ്റി നിര്‍ത്തുകയാണെന്ന തരത്തില്‍ ആരോപണങ്ങളും ഉയരുന്നുണ്ട്.

Sandeep Warrier responds to V. Muraleedharan's remarks