കൊച്ചി: കൊവിഡ് ലോക്ക് ഡൗണിനിടെ ജോര്‍ദാനിലെ ഷൂട്ടിംഗ് ലൊക്കേഷനില്‍ കുടുങ്ങിപ്പോയ നടന്‍ പൃഥ്വിരാജും സംഘവും തിരിച്ചെത്തി. 58 അംഗ സംഘമാണ് ജോര്‍ദാനില്‍ രണ്ട് മാസത്തിലേറെയായി കുടുങ്ങിയത്.

കൊച്ചിയിലാണ് ഇവര്‍ വിമാനമിറങ്ങിയത്. എയര്‍ ഇന്ത്യയുടെ പ്രത്യേക വിമാനത്തില്‍ ദില്ലി വഴിയാണ് പൃഥ്വിരാജും സംഘവും കൊച്ചിയിലെത്തിയത്. ആടു ജീവിതം സിനിമയുടെ ഷൂട്ടിംഗിനായാണ് ഇവര്‍ ജോര്‍ദാനിലേക്ക് പോയത്.

സംഘം ആരോഗ്യ വകുപ്പ് നിര്‍ദ്ദേശിക്കുന്ന ക്വാറന്റീന്‍ പാലിക്കും. പണം നല്‍കിയുള്ള ക്വാറന്റീന്‍ സൗകര്യത്തില്‍ ഫോര്‍ട്ട് കൊച്ചിയിലാണ് ഇവര്‍ കഴിയുക. സംവിധായകന്‍ ബ്ലസി തിരുവല്ലയിലെ വീട്ടിലാകും ക്വാറന്റീനില്‍ കഴിയുകയെന്നാണ് വിവരം.

ഇടക്ക് സിനിമാ ചിത്രീകരണം നിലച്ച് പോയെങ്കിലും പ്രതിസന്ധികള്‍ മറികടന്ന് ഷെഡ്യൂള്‍ പൂര്‍ത്തിയാക്കിയാണ് മടങ്ങിയെത്തിയിരിക്കുന്നത്.