ആംസ്റ്റര്‍ഡാം: മുഖാവരണ നിരോധനത്തിന് ഡച്ച് ഉപരിസഭയുടെ അംഗീകാരം. സര്‍ക്കാര്‍ ഓഫിസുകള്‍, സ്‌കൂള്‍ ഉള്‍പ്പെടെയുള്ള പൊതു സ്ഥലങ്ങള്‍ തുടങ്ങിയ ഇടങ്ങളില്‍ മുഖാവരണം ധരിക്കുന്നതിനെതിരേയുള്ള ബില്ലാണ് പാര്‍ലമെന്റ് പാസാക്കിയത്. 2016ല്‍ അധോസഭയുടെ അംഗീകാരം ലഭിച്ച ബില്ലാണ് ഉപരിസഭയില്‍ ബില്ലിനിട്ടത്. ബുര്‍ഖ ഉള്‍പ്പെടെയുള്ള മുഖം മറക്കുന്ന മുഴുവന്‍ വസ്ത്രങ്ങളും നിരോധിക്കാനുള്ള ശ്രമമായിരുന്നു അന്ന് നടന്നത്. സ്‌കൂള്‍, ആശുപത്രി ഉള്‍പ്പെടെയുള്ള പൊതുസ്ഥലങ്ങളുടെ സുരക്ഷക്കായാണ് ഹിജാബ് നിരോധനം ഏര്‍പ്പെടുത്തിയതെന്നാണ് ബില്ല് കൊണ്ടുവന്നവരുടെ വാദം. 

എന്നാല്‍ ഇസ്‌ലാം മത വിശ്വാസികളെ മാത്രം ലക്ഷ്യമാക്കിയുള്ള നിയമനിര്‍മാണമാണിതെന്നും നിഖാബ്, ബുര്‍ഖ ഉള്‍പ്പെടെയുള്ളവ നിരോധനിക്കാനുള്ള ശ്രമമാണിതെന്നുമെന്നും ആരോപണം ഉയര്‍ന്നിട്ടുണ്ട്. ഇസ്‌ലമിക മത വിശ്വാസ പ്രകാരം മുഖ ആവരണം നടത്തുന്നതിന് വിലക്കുകളൊന്നുമില്ലെന്ന് 2015ല്‍ ചേര്‍ന്ന ഡച്ച് ഭരണഘടനാ ഉപദേശക സമിതി വ്യക്തമാക്കിയിരുന്നു. മതവിശ്വസ സ്വാതന്ത്ര്യത്തെ ഹനിക്കാനാവില്ലെന്നായിരുന്നു സമിതിയുടെ അഭിപ്രായം. ഇത് അവഗണിച്ചുകൊണ്ടാണ് ഇരു സഭകളിലും മുഖാവരണം നിരോധിക്കാനുള്ള ബില്ലില്‍ വോട്ടെടുപ്പ് നടത്തിയത്. ഡച്ച് നിയമ പ്രകാരം പൊതുഗതാഗത സര്‍വിസിലും സ്‌കൂളുകളിലും മുഖാവരണം ധരിക്കുന്നതിന് വിലക്കുണ്ട്. ബെല്‍ജിയം, ഫ്രാന്‍സ്, ഡന്മാര്‍ക്ക്, സ്‌പെയില്‍ തുടങ്ങിയ രാജ്യങ്ങളില്‍ മുഖാവരണം ധരിക്കുന്നതിനെതിരേ നടപടികള്‍ സ്വീകരിച്ചിട്ടുണ്ട്.