റിയാദ്: സംഘര്‍ഷം രൂക്ഷമായ യമനില്‍ വിമത നിയന്ത്രണത്തിലുള്ള കോടതി മാധ്യമ പ്രവര്‍ത്തകന് വധശിക്ഷ വിധിച്ചു. തലസ്ഥാന നഗരിയായ സന്‍ആയിലെ ഹൂതി കോടതിയാണ് വധശിക്ഷ വിധിച്ചത്. ഔദ്യോഗിക സര്‍ക്കാരുമായും ഇവര്‍ക്ക് വേണ്ടി യുദ്ധത്തിലേര്‍പ്പെട്ട സഊദി അറേബ്യയുടെ കീഴിലുള്ള സഖ്യ സൈന്യത്തിന് അനുകൂലമായും വാര്‍ത്തകള്‍ റിപ്പോര്‍ട്ട് ചെയ്തുവെന്ന കാരണത്തിലാണ് വധശിക്ഷ വിധിച്ചതെന്നു ഹൂതികളും യമന്‍ ജേര്‍ണലിസ്റ്റ് അസോസിയേഷനും വ്യക്തമാക്കി.

യഹ്‌യ അബ്ദുല്‍ റഖീബ് എന്ന മാധ്യമ പ്രവര്‍ത്തകനാണ് വധശിക്ഷ വിധിക്കപ്പെട്ടത്. അറബ് സഖ്യസേനയിലെ നേതൃസ്ഥാനം വഹിക്കുന്ന സന്‍ആയിലെ സഊദി എമ്പസിയുമായി ബന്ധപ്പെട്ടു പ്രവര്‍ത്തിച്ചുവന്ന ആരോപണമാണ് ഹൂതികള്‍ ഗുരുതരമായി കണ്ടെത്തിയത്. കഴിഞ്ഞ വര്‍ഷം സെപ്തംബറില്‍ അറസ്റ്റു ചെയ്യപ്പെട്ട ഇദ്ദേഹത്തിന്റെ പക്കല്‍ നിന്നും പണം കണ്ടെത്തിയതായും ഹൂതികള്‍ ആരോപിക്കുന്നുണ്ട്.

മാധ്യമ പ്രവര്‍ത്തകര്‍ക്ക് നേരെ നടക്കുന്ന ആക്രമണത്തില്‍ ഏറ്റവും മുന്നില്‍ നില്‍ക്കുന്ന രാജ്യങ്ങളില്‍ ഒന്നാണ് യമന്‍. നിലവില്‍ പത്തോളം മാധ്യമ പ്രവര്‍ത്തകര്‍ ഹൂതികളുടെ കസ്റ്റഡിയില്‍ ഉണ്ടെന്നാണ് വിവരം. സംഭവത്തിനെതിരെ ശക്തമായ പ്രതിഷേധങ്ങള്‍ ഉയര്‍ന്നിട്ടുണ്ട്. ഇവരെ വിട്ടയക്കണമെന്നനും ആവശ്യം ഉയര്‍ന്നിട്ടുണ്ട്. യമനിലെ മാധ്യമ പ്രവര്‍ത്തകരുടെ കൂട്ടായ്മയായ യമന്‍ ജേര്‍ണലിസ്റ്റ് സിന്‍ഡിക്കേറ്റ് (വൈ.ജെ.എസ്) സംഭവത്തെ ശക്തമായി അപലപിച്ചു.