കൊല്‍ക്കത്ത: ബംഗാളിലും വിജയസാധ്യതയുള്ള സ്ഥാനാര്‍ഥികളില്ലാതെ ബി.ജെ.പി നട്ടംതിരിയുന്നു. ഇന്നലെ സംസ്ഥാന ബി.ജെ.പി അധ്യക്ഷന്‍ ദിലീപ് ഘോഷ് തന്നെയാണ് ഇക്കാര്യം വ്യക്തമാക്കിയത്.
കഠിനാധ്വാനികളായ പാര്‍ട്ടി നേതാക്കളും പ്രവര്‍ത്തകരും ഇഷ്ടംപോലെയുണ്ട്. അത്തരത്തില്‍ മികവുറ്റവര്‍ക്ക് പഞ്ചായത്ത്-നിയമസഭാ തെരഞ്ഞെടുപ്പുകളില്‍ സ്ഥാനാര്‍ഥിത്വം നല്‍കിയിരുന്നു. എന്നാല്‍ ലോക്‌സഭാ തെരഞ്ഞെടുപ്പില്‍ കാര്യം അത്ര പന്തിയല്ലെന്നാണ് ദിലീപ് ഘോഷ് പറയുന്നത്.
തെരഞ്ഞെടുപ്പില്‍ വിജയസാധ്യതയുള്ള നേതാക്കളെ മത്സരിപ്പിക്കാന്‍ ഇല്ലെന്നത് വാസ്തവമാണെന്നാണ് അദ്ദേഹം വെളിപ്പെടുത്തിയത്.
തെരഞ്ഞെടുപ്പില്‍ 42 ലോക്‌സഭാ സീറ്റുകളുള്ള സംസ്ഥാനത്ത് ചുരുങ്ങിയത് 23 സീറ്റുകളിലെങ്കിലും പാര്‍ട്ടി സ്ഥാനാര്‍ഥികള്‍ ജയിക്കണമെന്നാണ് ദേശീയ അധ്യക്ഷന്‍ അമിത്ഷാ സംസ്ഥാന നേതൃത്വത്തിന് നല്‍കിയ നിര്‍ദേശം. എന്നാല്‍ വിജയസാധ്യതയുള്ള സ്ഥാനാര്‍ഥികളില്ലെന്ന് തുറന്നുപറഞ്ഞ സംസ്ഥാന അധ്യക്ഷന്‍ കേന്ദ്ര നേതൃത്വത്തിന്റെ നിര്‍ദേശം എങ്ങനെ പാലിക്കുമെന്ന് അറിയില്ലെന്നും വ്യക്തമാക്കി.