താമരശ്ശേരി: കഞ്ചാവ് ഉപയോഗിച്ചതിന് താമരശ്ശേരി പൊലിസ് പിടികൂടിയ പ്രതിയുടെ പരാക്രമത്തില്‍ എ.എസ്.ഐക്ക് പരുക്ക്. കൊടുവള്ളി വാവാട് കണ്ണിപ്പൊയില്‍ കെ.പി നവാസ് ആണ് കഞ്ചാവ് ലഹരിയില്‍ താമരശ്ശേരി പൊലിസ് സ്റ്റേഷനില്‍ അക്രമം കാണിച്ചത്. അക്രമത്തില്‍ പരുക്കേറ്റ എ.എസ്.ഐ അസ്സയിന്‍ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സ തേടി. ശനിയാഴ്ച രാത്രിയിലാണ് താമരശ്ശേരി പുതിയ ബസ്സ്റ്റാന്‍ഡ് പരിസരത്തുനിന്ന് നവാസിനെയും സുഹൃത്തിനെയും താമരശ്ശേരി എസ്.ഐ ശറഫുദ്ദീന്റെ നേതൃത്വത്തിലുള്ള പൊലിസ് സംഘം പിടികൂടിയത്.

സ്‌റ്റേഷനിലെത്തിച്ചതോടെ നവാസ് പരാക്രമം ആരംഭിച്ചു. സ്‌റ്റേഷനിലെ ജനല്‍ ചില്ലില്‍ തലയിടിച്ച് ചില്ല് തകര്‍ത്തു. ഇതിനിടെ ഡ്യൂട്ടിയിലുണ്ടായിരുന്ന എ.എസ്.ഐ അസ്സയിനും ഏതാനും പൊലിസുകാര്‍ക്കും പരുക്കേറ്റു. കൈക്ക് സാരമായി മുറിവേറ്റ എ.എസ്.ഐ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സ തേടി.
സംഭവത്തില്‍ പൊലിസിനെ അക്രമിച്ചതിനും പൊതുമുതല്‍ നശിപ്പിച്ചതിനും നവാസിനെതിരേ കേസെടുത്തിട്ടുണ്ട്. താമരശ്ശേരി കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.