ദേശമംഗലം: ജീവകാരുണ്യ രംഗത്ത് പുണ്യ മഹിമയുടെ ഒട്ടേറെ ചരിത്ര നിമിഷങ്ങള്‍ നാടിന് സമ്മാനിച്ച ദേശമംഗലം തലശ്ശേരി എം.എസ്.എ ബനാത്ത് യത്തീംഖാന മറ്റൊരു ചരിത്ര നിമിഷത്തിന് കൂടി സാക്ഷ്യം വഹിച്ചു. യത്തീംഖാനയിലെ നാല് അന്തേവാസിനികള്‍ കൂടി ദാമ്പത്യ ജീവിതത്തിലേയ്ക്ക് പ്രവേശിച്ചു. ഇതോടെ 96 വിവാഹങ്ങള്‍ നടത്തിയതിന്റെ നിറധന്യതയിലാണ് ബനാത്ത് യത്തീംഖാന. ചളവറ സ്വദേശിനി ജഷീലക്ക് ആറ്റൂര്‍ സ്വദേശി ഷെഫീഖും, പെരിങ്കന്നൂര്‍ സ്വദേശിനി മുഫീദയ്ക്ക് വല്ലപ്പുഴ സ്വദേശി ഷഫീഖും, കേച്ചേരി സ്വദേശിനി ഷഫീറക്ക് നെടുമ്പുര സ്വദേശി സുധീറും, വടക്കാഞ്ചേരി സ്വദേശിനി ജാസ്മിന് തളി സ്വദേശി ഷഫീഖുമാണ് ജീവിത യാത്രയില്‍ കൂട്ടായത്. ഇന്നലെ നടന്ന വിവാഹ ചടങ്ങില്‍ കെ.പി.സി തങ്ങള്‍ വല്ലപ്പുഴ കാര്‍മികത്വം വഹിച്ചു. കെ.എം സാദിഖ് മുസ്‌ലിയാര്‍, ഏന്തീന്‍ കുട്ടി ഹാജി, പി.എം ഹംസ മാസ്റ്റര്‍, ഹംസ, കെ.ആലിക്കുട്ടി മുസ്‌ലിയാര്‍, എം.എം മുഹയുദ്ധീന്‍ പങ്കെടുത്തു.