കാസര്‍കോട്: ഇന്നു മുതല്‍ 16 വരെ തളങ്കര മാലിക് ദിനാറില്‍ പ്രത്യേകം സജ്ജമാക്കിയ ഹുദൈബിയ്യ നഗറില്‍ നടക്കുന്ന എസ്.കെ.എസ്.എസ്.എഫ് ജില്ലാ സമ്മേളനം 'മദീനാ പാഷന്' ഇന്നു കൊടിയുയരും. വൈകുന്നേരം 4.30നു നടക്കുന്ന മാലിക് ദിനാര്‍ മഖാം സിയാറത്തോടെ സമ്മേളനം ആരംഭിക്കും. തുടര്‍ന്ന് പി.ബി അബ്ദുല്‍ റസാഖ് എം.എല്‍.എ പതാക ഉയര്‍ത്തും. അഞ്ചിന് 'മാനവികതക്ക് മദീനയുടെ സ്‌നേഹം' എന്ന വിഷയത്തില്‍ മതസൗഹൃദ സമ്മേളനം സമസ്ത വിദ്യാഭ്യാസ ബോര്‍ഡ് പ്രസിഡന്റ് പി.കെ.പി അബ്ദുസലാം മുസ്‌ലിയാര്‍ ഉദ്ഘാടനം ചെയ്യും.  7.30നു നടക്കുന്ന മജ്‌ലിസുന്നൂര്‍ സംഗമവും ഖുത്വബാ സംഗമവും പാണക്കാട് സയ്യിദ് ശഫീഖലി ശിഹാബ് തങ്ങള്‍ ഉദ്ഘാടനം ചെയ്യും.
15ന് രാവിലെ ഒന്‍പതിനു നഗരസഭാടൗണ്‍ ഹാളില്‍ ഗ്രാന്റ് അസംബ്ലി നടക്കും. പഠന സംഗമം സമസ്ത ജില്ലാ ജനറല്‍ സെക്രട്ടറി യു.എം അബ്ദുല്‍ റഹിമാന്‍ മൗലവി ഉദ്ഘാടനം ചെയ്യും. 'സമസ്ത വിശ്വ ഇസ്‌ലാമിക ഏകകം' എന്ന വിഷയത്തില്‍ അബ്ദു സമദ് പൂക്കോട്ടൂര്‍ പ്രഭാഷണം നടത്തും. തുടര്‍ന്ന് നടക്കുന്ന സെഷന്‍ സമസ്ത വിദ്യാഭ്യാസ ബോര്‍ഡ് സെക്രട്ടറി എം.എം ഖാസിം മുസലിയാര്‍ ഉദ്ഘാടനം ചെയ്യും. ആദര്‍ശ സെഷന്‍ എസ്.എം.എഫ് ജില്ലാ പ്രസിഡന്റ് ചെര്‍ക്കളം അബ്ദുല്ല ഉദ്ഘാടനം ചെയ്യും.
16ന് മൂന്നിനു കാസര്‍കോട് പുതിയ ബസ് സ്റ്റാന്‍ഡ് പരിസരത്ത് നിന്ന് പ്രകടനം ആരംഭിക്കും. 5.30ന് പൊതു സമ്മേളനം മാലിക് ദിനാര്‍ ഗ്രൗണ്ടില്‍ സമസ്ത ജനറല്‍ സെക്രട്ടറി പ്രൊഫ. കെ ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. എസ്.വൈ.എസ് സംസ്ഥാന വൈസ് പ്രസിഡന്റ് റഹ്മത്തുള്ള ഖാസിമി മുത്തേടം മദീനാപാഷന്‍ സന്ദേശം നല്‍കും. എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തല്ലൂര്‍ മുഖ്യപ്രഭാഷണം നടത്തും.