ന്യൂഡല്‍ഹി: സൈനികരുടെ രക്തം നരേന്ദ്രമോദിയും ബി.ജെ.പിയും രാഷ്ട്രീയനേട്ടത്തിനുപയോഗിക്കുന്നുവെന്ന ആരോപണവുമായി കോണ്‍ഗ്രസ്. ഇന്ത്യന്‍ സൈന്യം 2016 സെപ്തംബറില്‍ പാക് അധിനിവേശ കശ്മിരില്‍ നടത്തിയ മിന്നലാക്രമണത്തിന്റെ വീഡിയോ സര്‍ക്കാര്‍ പുറത്തുവിട്ടതിന് പിന്നാലെയാണ് ബി.ജെ.പിയെ രൂക്ഷമായി വിമര്‍ശിച്ച് കോണ്‍ഗ്രസ് രംഗത്തെത്തിയത്.

ഉത്തര്‍പ്രദേശ് നിയമസഭാ തെരഞ്ഞെടുപ്പ് കാലത്ത് രാഷ്ട്രീയനേട്ടത്തിനായി ബി.ജെ.പി ഒരു നാണവുമില്ലാതെ മിന്നലാക്രമണത്തെ ഉപയോഗിച്ചുവെന്ന് കോണ്‍ഗ്രസ് വക്താവ് രണ്‍ദീപ് സുര്‍ജെവാല ആരോപിച്ചു.

മോദി സര്‍ക്കാര്‍ 'ജയ് ജവാന്‍ ജയ് കിസാന്‍' എന്ന മുദ്രാവാക്യത്തെ ദുരുപയോഗം ചെയ്യുകയാണ്. മുന്‍ പ്രധാനമന്ത്രിമാരായ മന്‍മോഹന്‍ സിങോ അടല്‍ ബിഹാരി വാജ്‌പേയിയോ സൈന്യത്തിന്റെ ധൈര്യത്തെ വോട്ടുകള്‍ സ്വരൂപിക്കാന്‍ വേണ്ടി ചൂഷണം ചെയ്തിട്ടില്ല. ജീവന്‍ നഷ്ടപ്പെടുത്തിയത് ജവാന്‍മാരും അതിന്റെ ഖ്യാതി സമ്പാദിച്ചത് മോദിയുമാണെന്നും സുര്‍ജേവാല മാധ്യമങ്ങളോട് പറഞ്ഞു.