ഉരുവച്ചാല്‍: എറണാകുളം മെഡിക്കല്‍ കോളജില്‍ ചികിത്സാ പിഴവ് മൂലം മെഡിക്കല്‍ വിദ്യാര്‍ഥിനി ഷംന മരിച്ച സംഭവത്തില്‍ നീതി ലഭ്യമാക്കണമെന്നാവശ്യപ്പെട്ട് ആക്ഷന്‍ കമ്മിറ്റി മന്ത്രി കെ.കെ ശൈലജയ്ക്ക് നിവേദനം നല്‍കി. ഷംനയുടെ കുടുംബത്തിന് 25 ലക്ഷം രൂപ നഷ്ടപരിഹാരം നല്‍കണമെന്നും ഇവര്‍ ആവശ്യപ്പെട്ടു. നിവേദനം സ്വീകരിച്ച മന്ത്രി ആവശ്യമായ നടപടി സ്വീകരിക്കുമെന്നും വിഷയം നിയമസഭയില്‍ ചര്‍ച്ച ചെയ്യുമെന്നും പ്രവര്‍ത്തകര്‍ക്ക് ഉറപ്പ് നല്‍കി. എറണാകുളം മെഡിക്കല്‍ കോളജിലെ രണ്ടാംവര്‍ഷ എം.ബി.ബി.എസ് വിദ്യാര്‍ഥിനി മട്ടന്നൂര്‍ ശിവപുരം മട്ടുമ്മല്‍ അയിഷാ മന്‍സിലില്‍ കെ.എ അബൂട്ടിയുടെ മകള്‍ ഷംന(20)യാണ് കഴിഞ്ഞ ജൂലൈ 18നു മരണപ്പെട്ടത്. പനി ബാധിച്ച് എറണാകുളം മെഡിക്കല്‍ കോളജില്‍ പ്രവേശിപ്പിക്കുകയും തെറ്റായ മരുന്ന് കുത്തിവച്ചതിനാല്‍ മരണപ്പെടുകയുമായിരുന്നു. എന്നാല്‍ മരണം മറച്ചുവച്ച് ആശുപത്രി അധികൃതര്‍ ഷംനയെ രാജഗിരി ആശുപത്രിയിലേക്ക് മാറ്റി. മെഡിക്കല്‍ റിപ്പോര്‍ട്ടില്‍ രാജഗിരി ആശുപത്രിയില്‍ എത്തിച്ചപ്പോള്‍ ഷംനക്ക് പള്‍സ് റേറ്റ് ഇല്ലായിരുന്നുവെന്നു പറയുന്നു. മരണം മറച്ചു വച്ചതിനു പിന്നില്‍ ദുരൂഹതയുണ്ടെന്നും ആക്ഷന്‍ കമ്മിറ്റി ആരോപിച്ചു. കേസ് അന്വേഷണം ഇപ്പോള്‍ ക്രൈംബ്രാഞ്ചിനാണ്. അന്വേഷണം അട്ടിമറിക്കാന്‍ ഉന്നതതലത്തില്‍ ശ്രമം നടക്കുന്നുണ്ടെന്നും ആക്ഷന്‍ കമ്മിറ്റി നിവേദനത്തില്‍ ചൂണ്ടിക്കാട്ടി. ചെയര്‍മാന്‍ കെ. ഗോപി, കണ്‍വീനര്‍ കാഞ്ഞിരോളി രാഘവന്‍, സഫീര്‍, എ. ജയരാജ്, വി.സി റസാഖ്, ഖാദര്‍, എം.പി നിസാര്‍ എന്നിവര്‍ നിവേദക സംഘത്തിലുണ്ടായി.